Тошкент метрополитенининг бир қатор бекатларида 7 июль куни электр энергияси ўчиб қолди. Ҳолат акс этган фото ва видеолар ижтимоий тармоқларда тарқалди.
«Ўзбекистон темир йўллари» компанияси матбуот хизматидан «Дарё»га маълум қилишларича, Тошкент метрополитени бекатларидаги ёритиш ускуналари, эскалаторлар, турникетлар «шаҳар (электр тармоқлари)га уланган», шу боис «шаҳарнинг ярмида свет ўчган вақтда (соат 12:55 дан 13:05 гача бўлган оралиқда) бекатларда ҳам чироқлар ўчиб қолиб, эскалаторлар ишламай қолган».
«Тошкент метрополитени» матбуот хизматининг маълум қилишича, 7 июль куни соат 12:55-13:05 оралиғида шаҳар электр таъминоти тизимида юзага келган носозлик сабабли Чилонзор, Юнусобод, Ўзбекистон йўлларида бекатларни ёритувчи ускуналар ишламаган, эскалаторлар тўхтаган. Поездлар ҳаракатланиши эса давом этган, «чунки поездларнинг ҳаракатини таъминловчи электр таъминоти алоҳида». Метрополитен матбуот хизмати келтирилган ноқулайликлар учун узр сўраган.
Ижтимоий тармоқларда қайд этилишича, кўрсатилган вақтда пойтахтнинг аксарият чорраҳаларида светофорлар ишламай қолган, «шаҳар марказидаги банклар ҳам чироқсиз, дизель-генераторларда ўтирибди». «Электр билан боғлиқ вазият ҳаммаёқда бирдан яхшиланиши учун айнан қаерда чироқ ўчиши кераклигини мен биламан, лекин айтмайман», — деб вазиятга изоҳ берган блогер @kurbanoffnet.
Эслатиб ўтамиз, бундан аввал Тошкент метрополитени Ҳалқа йўлининг 7-бекатида 7 май куни соат 21:10 да электр энергияси ўчиб қолганди. Узилиш шаҳарда содир бўлган, бу станциядаги 100 дона лампадан иборат ёритиш тизими ўчишига олиб келган. Ҳодиса метро поездлари ҳаракатига таъсир кўрсатмаганди.