«Касалликдан кейинги антитаналар маълум бир штаммга таъсир кўрсатади, шу сабабли барибир эмланиш керак» — эксперт
Ўзбекистон санитария-эпидемиологик осойишталик ва жамоат саломатлиги хизмати, вакциналар ва иммунопрофилактика бўлими бошлиғи Дилором Турсунова вакцина олишдан олдин антитаналар даражасини текширтириш, уларнинг даражаси юқори бўлса, вакцина олиш ёки олмаслик тўғрисидаги саволга жавоб берди, деб ёзадиTelegram’даги «Вакцинауз» канали.
Дилором Турсунованинг сўзларига кўра, коронавирусга қарши вакцина аутоиммун касалликларда, ҳомиладор ва эмизикли аёлларда, 18 ёшдан кичик бўлган болаларга ҳамда сурункали ёки бирон бир касалликнинг авж олган даврида қилиш тавсия этилмайди.
«Коронавирус билан кўп аҳоли деярли хасталангани қайд этилган. Шу боис уларнинг организмида антитаналар шаклланган бўлиши табиий. Бироқ бу энди вакцина олмасам ҳам бўлади, дегани эмас. Негаки ҳозирда кўп коронавируснинг янги штаммлари қайд этилмоқда. Шу сабабли олдин касал бўлганларда ҳам коронавирусга қайта чалиниш ҳолатлари қайд этилаётгани маълум. Ҳатто, айримларда иккинчи бор касалликни бошидан ўтказиши жуда оғир кечмоқда. Шу сабабли коронавирус билан оғриган фуқароларни ҳам 3 ой муддат ўтгандан сўнг, албатта, эмланишларини тавсия этмоқдамиз», — дейди Турсунова.
Унинг таъкидлашича, вакцина олиш учун антитаналарнинг организмдаги даражасининг ҳам аҳамияти йўқ. «Негаки антитаналар сизни бошингиздан ўтказган коронавируснинг маълум бир штаммига таъсир кўрсатади. Вакцина орқали унинг бир қанча штаммларини юқтириш хавфидан ҳимояланасиз», — дея қайд этади эксперт.
Аввалроқ Ўзбекистонда коронавирусга қарши эмланганлар сони салкам 2,5 миллион кишига етгани, Тошкентда 28 июндан 18 ёшдан катта бўлган барча қатлам коронавирус инфекциясига қарши давлат бюджети маблағлари ҳисобидан ихтиёрий тарзда оммавий эмланиши тўғрисида хабар берилганди.