Бугун,

  • USD 11014.01
  • RUB 191.8
  • EUR 10674.78

АҚШнинг собиқ мудофаа вазири Дональд Рамсфелд 88 ёшида вафот этди. Бу ҳақда унинг оиласи баёнотига таяниб, CNBC хабар берди.

Дональд Рамсфелд

Дональд Рамсфелд
Фото: AP Photo

Ню-Мексико штатида оила даврасида оламдан ўтган сиёсатчи оғир касал бўлган. Рамсфелд кўп миқдордаги миелома — плазма ҳужайраларидан ҳосил бўлган хавфли ўсма билан оғриган, деб хабар беради The New York Times оила вакилига асосланиб.

Дональд Рамсфелд икки марта Пентагон раҳбари бўлиб ишлаган: 1975—1977 йилларда АҚШнинг 38-президенти Жералд Форд даврида ҳамда 2001—2006 йилларда АҚШнинг 43-президенти кичик Жорж Буш маъмуриятида.

У 2001 йил 11 сентябрь терактларидан сўнг АҚШнинг Афғонистон ва Ироқдаги ҳарбий операцияларига масъул бўлган. Ўшанда террорчилар тўртта йўловчи самолётга ҳужум қилган, уларнинг иккитаси Манхэттендаги Жаҳон савдо марказининг шимолий ва жанубий минораларига бориб урилган.

«Ал-Қоида» террорчилик ташкилоти ҳужум учун жавобгарликни ўз зиммасига олган, Америка махсус хизматлари ҳам шу версияга содиқ бўлган.

Ҳужумдан кейин президент Буш Афғонистондаги «Ал-Қоида» ва «Толибон» манзилларини бомбардимон қилишга буйруқ берган. Шу тариқа АҚШнинг Афғонистондаги ҳарбий кампанияси бошланган.

Вашингтоннинг асосий нишонларидан бири «Ал-Қоида» раҳбари Усама бин Ладен эди. Федерал қидирув бюроси у жойлашган жойи тўғрисидаги маълумот учун 25 миллион доллар мукофот эълон қилди. Бин Ладен 2011 йилда Рамсфелд Пентагонни тарк этганидан кейин ўлдирилган.

АҚШ ва иттифоқчиларнинг Ироққа бостириб кириш бўйича ҳарбий амалиёти 2003 йил март ойида бошланиб, май ойининг бошларига қадар давом этган. Вашингтон Ироқ президенти Саддам Ҳусайн режимини халқаро терроризм, хусусан, «Ал-Қоида» билан алоқада, шунингдек, оммавий қирғин қуролларини ишлаб чиқариш ва сақлашда айблади. Охир-оқибат Ҳусайн режими ағдарилиб, президентнинг ўзи қатл этилди.

Изоҳ
Асосий янгиликлар