Ижтимоий тармоқларда Андижон вилояти ҳокими Шуҳрат Абдураҳмонов кенжа қизининг тўйи бўлаётгани ҳақидаги хабарлар ва ушбу тадбирга тегишлилиги айтилган фото ва видеолар тарқалди. Унда айтилишича, тўй 3 кун бўлган, асосий тадбир 26 июнь куни Андижондаги энг катта тўйхонада бўлиб ўтган.

Вилоят ҳокимлиги матбуот хизмати ушбу хабарларга муносабат билдирди. Маълум қилинишича, ҳақиқатан ҳам, видеолавҳанинг биринчи қисмида Андижон вилояти ҳокимининг қизи ва куёвининг унаштирув маросимидаги суратлар акс этган.

Андижон вилояти ҳокимининг қизиники экани айтилаётган тўй тадбиридан олинган сурат.

Фото: Telegram

Андижон вилояти ҳокими яқин кунларда қизини турмушга узатганлиги маълум. Аммо тарқатилган видеонинг иккинчи қисмида турли хил кийим кечаклар, уй-жойлар акс эттирилган суратлар вилоят ҳокимига умуман алоқадор эмаслиги, интернет тармоқларидан кўчириб олинган суратлар ёрдамида тайёрланганлиги аниқланган.

«Ҳурматли ижтимоий тармоқ фойдаланувчилари, юқоридагиларни инобатга олиб, ёлғон ахборот тарқатиш, шу жумладан, оммавий ахборот воситаларида, телекоммуникация тармоқларида ёки интернет тармоғида тарқатиш ҳолатлари учун қонуний жазо чоралари мавжуд эканини эслатиб ўтамиз», — дейилади ҳокимлик муносабатида.