Бухоро вилоятида яшовчи талаба бобосининг уйидан 4,5 минг доллар ўғирлаб, уйни ёқиб юборди, дея хабар қилмоқда Buxoro News.
Маълум қилинишича, интернет тармоғидаги 1Хbet номли дастур орқали турли (қимор) ўйинларга пулини ютқазиб қўйган О.Қ. 2020 йил 22 декабрдан 24 декабрь кунига қадар бўлган вақт оралиғида бобоси яшаб келаётган Бухоро шаҳридаги хонадонга, ғайриқонуний равишда кириб, бобосига тегишли жами 4 500 АҚШ долларини яширин равишда талон-торож қилган.
Ўғирлик жиноятини содир этган ва уни яшириш мақсадида ётоқхона ва ошхонага 10 литр бензин сепиб, ўт қўйган.Маълум бўлишича фуқаро О.Қ. Бухоро муҳандислик-технология институтининг 4-босқич талабаси бўлган.
Жиноят юзасидан 2021 йил 17 май куни Пешку туман суд мажлисида жиноятнинг ижтимоий хавфи катта бўлмаган жиноят турига кириши, жиноятчининг қилмишидан пушаймонлиги, муқаддам судланмагани, жиноят оқибатида етказилган зарарни тўлиқ қоплагани ва жабрланувчи бобосининг даъвоси йўқлиги ҳамда унга нисбатан қонуний енгиллик берилишини сўраб қилган мурожаатига кўра Жиноят кодексининг 169-модда(ўғрилик), 173-модда (мулкни қасддан нобуд қилиш ёки унга зарар етказиш) ва 57-модда (енгилроқ жазо тайинлаш) 59-модда (бир неча жиноят содир этганлик учун жазо тайинлаш) ва 25-173-моддаларига асосан жарима жазоси тайинланган.
Бундан аввал Қорақалпоғистонда пулларини букмекерлик конторасида ютқазган йигитга нисбатан жиноят иши қўзғатилгани, Сурхондарёда хонадонида қимор ўйнаётган ота-бола ва уларнинг шериклари қўлга олингани ҳамда Самарқандда ижара уйини қиморхонага айлантирган 25 ёшли йигитга жиноят иши қўзғатилгани ҳақида хабар берилганди.
Изоҳ (0)