Buxoro viloyatida yashovchi talaba bobosining uyidan 4,5 ming dollar o‘g‘irlab, uyni yoqib yubordi, deya xabar qilmoqda Buxoro News.
Ma’lum qilinishicha, internet tarmog‘idagi 1Xbet nomli dastur orqali turli (qimor) o‘yinlarga pulini yutqazib qo‘ygan O.Q. 2020-yil 22-dekabrdan 24-dekabr kuniga qadar bo‘lgan vaqt oralig‘ida bobosi yashab kelayotgan Buxoro shahridagi xonadonga, g‘ayriqonuniy ravishda kirib, bobosiga tegishli jami 4 500 AQSh dollarini yashirin ravishda talon-toroj qilgan.
O‘g‘irlik jinoyatini sodir etgan va uni yashirish maqsadida yotoqxona va oshxonaga 10 litr benzin sepib, o‘t qo‘ygan.Ma‘lum bo‘lishicha fuqaro O.Q. Buxoro muhandislik-texnologiya institutining 4-bosqich talabasi bo‘lgan.
Jinoyat yuzasidan 2021-yil 17-may kuni Peshku tuman sud majlisida jinoyatning ijtimoiy xavfi katta bo‘lmagan jinoyat turiga kirishi, jinoyatchining qilmishidan pushaymonligi, muqaddam sudlanmagani, jinoyat oqibatida yetkazilgan zararni to‘liq qoplagani va jabrlanuvchi bobosining da’vosi yo‘qligi hamda unga nisbatan qonuniy yengillik berilishini so‘rab qilgan murojaatiga ko‘ra Jinoyat kodeksining 169-modda(o‘g‘rilik), 173-modda (mulkni qasddan nobud qilish yoki unga zarar yetkazish) va 57-modda (yengilroq jazo tayinlash) 59-modda (bir necha jinoyat sodir etganlik uchun jazo tayinlash) va 25-173-moddalariga asosan jarima jazosi tayinlangan.
Bundan avval Qoraqalpog‘istonda pullarini bukmekerlik kontorasida yutqazgan yigitga nisbatan jinoyat ishi qo‘zg‘atilgani, Surxondaryoda xonadonida qimor o‘ynayotgan ota-bola va ularning sheriklari qo‘lga olingani hamda Samarqandda ijara uyini qimorxonaga aylantirgan 25 yoshli yigitga jinoyat ishi qo‘zg‘atilgani haqida xabar berilgandi.
Izoh (0)