АОКАда 24 июнь куни 2021/2022-ўқув йилида ОТМларга ўқишга қабул қилишнинг давлат буюртмаси бўйича матбуот анжумани ўтказилди.
Анжуманда иштирок этган ДТМ директори Мажид Каримовнинг таъкидлашича, кириш имтиҳонлари харажатлари қарийб 30 миллиард сўмни ташкил этади.
«Бизга бюджетдан энг минимал маблағ берилади. Биласиз, бизда ўзимизнинг таянч экспертлар, ташқаридан жалб қилинган экспертлар, чет тилларини баҳолаш бўйича экспертлар ишлашади. Бундан ташқари, биз февралдан мартгача ҳарбий қисмларга бориб, тест оламиз. Буларнинг ҳаммаси учун харажат қарийб 30 миллиард сўмдан ошади», — деди Мажид Каримов.
Қайд этилишича, бугунгача 50 мингдан ортиқ абитуриент онлайн рўйхатдан ўтган.
Эслатиб ўтамиз, Ўзбекистонда 20 июндан ОТМларга онлайн қабул бошланган ва қабул квоталари тасдиқланган.
