Самарқанд вилояти Жомбой туманида 2020 йилнинг июлида аукцион орқали хотинининг номига олинган 2 гектар ер майдонининг бир қисмини сотишга уринган шахс қўлга олинди. Бу ҳақда «Ўзбекистон 24» телеканалида маълум қилинди.

Кадр: YouTube

Маълум қилинишича, ушбу фуқаро ерни 2 йилда 1 миллиард сўм инвестиция киритиш шарти билан олган.

Муқаддам ИИО ва солиқ идораларида раҳбар лавозимларида ишлаган мазкур шахс ушбу ер майдонининг 40 сотихини ҳокимиятдаги танишлари орқали кадастр ҳужжатларини расмийлаштириб, харидор номига ўтказиб бериш учун 19,5 минг доллар талаб қилган. У олдиндан 15 минг АҚШ долларини олган вақтида тезкор тадбирда ушланган.

Шунингдек, Қарши шаҳрида Қарши тумани ҳокимлигида қишлоқ хўжалиги бўлими мутахассиси ўзининг фермер хўжалиги балансида бўлган 9 гектар сувли ер майдонини 9,5 минг долларга сотган вақтида қўлга олинган.

Аниқланишича, у муқаддам фирибгарлик жинояти билан судланган.

Ҳозирда ушбу шахсларга нисбатан Жиноят кодексининг тегишли моддалари билан жиноий иш қўзғатилиб, тергов олиб борилмоқда.

Аввалроқ Тошкентда ер олиб беришни ваъда қилиб, фуқародан 52 800 доллар олган шахс ушлангани, Андижонда 100 гектар ер ажратиб бериш эвазига 128 минг доллар пора олган мансабдор шахсларга суд ҳукми ўқилгани, Фарғонада Кореядаги университетга имтиҳонсиз киритиб қўйишни ваъда қилиб, мактаб ўқувчиларидан жами 20 миллион сўм олган шахслар аниқлангани ҳамда Ангренда 3,5 минг доллар эвазига Жисмоний тарбия университетига киритиб қўймоқчи бўлган шахс ушлангани ҳақида хабар берилганди.