Шавкат Мирзиёев Андижон вилоятига икки кунлик амалий ташрифини Избоскандаги тўқимачилик корхонасини бориб кўришдан бошлаганди. Шундан сўнг давлат раҳбари Пахтаобод туманидаги инновацион иссиқхонани бориб кўрди.
Президент матбуот хизматининг хабар беришича, ушбу иссиқхонанинг инновационлиги шундаки, бу жой илгари тош-шағал карери бўлган. Ердан унумли фойдаланиш сиёсати натижасида у экинзорга айлантирилди. Mega agro масъулияти чекланган жамияти бу ерда Испания технологияси асосида иссиқхона қурди.
«Бу технологияда экин полиэтилен қувурчалар орқали суғорилади. Энг муҳими, сув исроф бўлмайди, доимий айланиб туради. Тадбиркор учун 16 гектар ер ажратилган. Шундан 6 гектарида очиқ ва ёпиқ иссиқхона ташкил этилган. Яна 2 гектарда Туркия ва Испаниядан олиб келинган замонавий ускуналар ўрнатилмоқда», — деб таъкидланган хабарда.
Маълум қилинишича, иссиқхоналарда «Айсберг» карами, помидор, бодринг, уларнинг кўчатлари ва ҳар хил кўкатлар етиштирилади. Уларни юртимиз бозорларига етказиб бериш, шунингдек, йилига 1 миллион 500 минг долларлик экспорт қилиш режалаштирилган. Корхонада 100 та иш ўрни яратилган.
Давлат раҳбари Андижонда металл конструкциялар корхонаси ташкил этиб, четдан сотиб олинаётган материалларни маҳаллийлаштириш, хусусан, иссиқхона деталларини ишлаб чиқариш бўйича топшириқ берди. Андижон қишлоқ хўжалиги институти вилоятда аграр соҳани инновацион ривожлантиришга акселератор бўлиши кераклиги таъкидланди.
Эслатиб ўтамиз, давлат раҳбарининг икки кунлик амалий ташрифи давомида тўқимачилик, агросаноат ва қишлоқ хўжалиги корхоналари фаолияти билан танишиш, бунёдкорлик ишларини кўздан кечириш режалаштирилган. «Янги Андижон» шаҳарчаси қурилишининг бошланиши ташрифнинг энг муҳим воқеаларидан бири бўлади.
Изоҳ (0)