Наманган вилоятининг Чортоқ тумани ҳокимлиги «Баланд адир» массивидаги иссиқхона ҳолати ҳақида ижтимоий тармоқларда тарқалган видеолавҳа юзасидан расмий баёнот берди. Видеорепортажда иссиқхона фойдаланишга топширилиб, Шавкат Мирзёевга намойиш этилганидан бир йил ўтиб харобага айлангани айтилган.
Туман ҳокимлигининг маълум қилишича, 1000 та кичик ҳажмдаги иссиқхона ҳақиқатан ҳам 2020 йилда «Golden Nuts Namangan» томорқа агрохизмати МЧЖ иштирокида қурилган. Бунинг учун жами 13,4 миллиард сўм маблағ сарфланган ва унда 1000 та янги иш ўрни яратилиб, «темир дафтар», «аёллар дафтари» ва «ёшлар дафтари»да турган фуқаролар ишга жойлаштирилган.
Шунингек, келиб-кетувчиларга қулайлик яратиш мақсадида туман марказидан «Баланд адир» массивига бепул автобус қатнови йўлга қўйилгани таъкидланган.
«Иссиқхоналарда мингга яқин томорқачи деҳқонлар ишлашмоқда. Помидорнинг Бўрон навини экканмиз. У икки ҳафтадан сўнг пишади. Тўлалигича Россияга экспорт қиламиз. Шу кунга қадар 1,5 миллион долларлик амалиётини бажардик. Йил охирига қадар бу кўрсаткич 5 миллион долларга етади», — деган томорқа хизмати раҳбари Аҳаджон Эгамбердиев.
Ҳокимликнинг билдиришича, 31 май ва 2 июнь кунлари бўлиб ўтган кучли шамол оқибатида иссиқхоналарнинг 30—35 фоиз қисмига жиддий зарар етган.
«Бу камчиликларни бартараф этиш бўйича туман ҳокимлигида муҳокама йиғилиши ўтказилиб, амалга оширилган ишлар билан бир қаторда йўл қўйилган хато ва камчиликлар таҳлил қилиб чиқилди. Кучли шамол оқибатларини бартараф этиш мақсадида иссиқхоналарда жадал экиш ва таъмирлаш ишлари олиб борилмоқда», — дея таъкидланган хабарда.