Makro супермаркетлар тармоғи Compass’даги жойини сотди. Энди у ерда Carrefour очилади

Makro супермаркетлар тармоғида Тошкентдаги Compass савдо-кўнгилочар марказидан кетмоқда. Бу ҳақда компания вакилларига таяниб, Spot хабар берди.

2021 йилнинг январь ойи ўрталарида тармоқнинг бошқарув директори Роман Сайфулин ушбу дўконни сотиш бўйича музокаралар олиб борилаётганини маълум қилганди. Ҳозирда улар якунлангани ва мазкур жойда Carrefour супермаркет бўлиши маълум қилинди.

Эслатиб ўтамиз, 7 январь куни Ўзбекистондаги Carrefour брендини бошқарадиган Дубайнинг Majid al-Futtaim компанияси Samarqand Darvoza ва Compass’га эгалик қилувчи UzOman фонди билан ушбу савдо-кўнгилочар марказларида Makro дўконлари ўрнида гипермаркетларни очиш тўғрисида шартнома имзолаганини эълон қилди. Makro Compass’да марказ очилганидан буён, яъни 2018 йилдан бери фаолият юритиб келган. Бу майдони 7,5 минг квадрат метрга тенг Ўзбекистондаги биринчи Makro City гипермаркети эди.

Makro супермаркетлар тармоғи бошқарувчиси Роман Сайфулин буни Makro ва унинг харидорлари учун кутилмаган «совға» бўлганини айтганди, «айниқса, якунланмаган шартномаларни ҳисобга олганда».

Компания уларнинг ҳуқуқлари қўпол равишда бузилган деб ҳисоблаган — савдо ва кўнгилочар марказ ижарага бериш шартларини бошқа даъвогарлар билан тенг шароитларда таклиф қилиш мажбурияти бўлган.

Апрель бошида эса Makro Samarqand Darvoza’дан расман кетгани маълум қилинди.