Спорткар нархидаги либос: Юлдузларнинг «Оскар» тарихидаги энг қиммат ва ҳашаматли образлари (фото)

Юлдузлар алоҳида тадбир ва зиёфатлар учун ўзига хос либос кийишни афзал билади. Голливудда ўз ўрнига эга бўлган актрисалар томонидан «Оскар» тақдирлаш маросимига кийилган энг қимматбаҳо либослар суратини эътиборингизга ҳавола қиламиз.

Женнифер Лоуренс (4 миллион доллар)

Актриса илк бор 2013 йилги маросимда пайдо бўлган. Dior бренди томонидан тақдим қилинган, этак қисми кенг оқ либос атрофдагиларни ўзига маҳлиё этмай қолмаган. 4 миллион долларлик либос мукофотни қабул қилиб олиш учун чиқаётган актрисанинг йиқилишига сабаб бўлган.

Шарлиз Терон (100 минг доллар)

Айнан шу йилги тақдирлаш маросимида ўзига хос услубда кийинган Шарлиз образ борасида Лоуренсга рақиб бўла олган. Актриса Christian Dior’дан нархи 100 минг долларни ташкил қиладиган оқ кўйлак кийган. Қўл иши билан майда кристаллар тикилган либос билан Шарлиз Harry Winston’дан 4 миллион долларлик билакузук таққан.

Люпита Нионго (150 минг доллар)

Люпитанинг Calvin Klein брендидан минглаб марваридлар билан қопланган оқ либоси ҳам тақдирлаш маросимининг энг машҳур образларидан бири ҳисобланган. Гап шундаки, маросимидан кейин ўғирлаб кетилган мазкур либос неча кунлардан кейин топилган.

Кейт Бланшетт (200 минг доллар)

2007 йилги «Оскар»нинг энг ҳашаматли либос эгаси эса Кейтга тегишли бўлган. Юлдуз Swarovski кристаллари билан безатилган 200 минг долларлик Armani Privé либосида ташриф буюрган.

Никол Кидман (2 миллион доллар)

Никол 1997 йил «Оскар»нинг тақдирлаш маросимига Дизайнер Жон Галяно томонидан сариқ ипак матосидан тикилган ўзига хос либос кийишни афзал билган.

Кейт Уинслетт (100 минг доллар)

2007 йилги «Оскар» маросимидаги Кейтнинг кийган либоси оддий ва сипо кўринса ҳам, унга нақд 100 минг долларга тушган.

Одри Хепберн (131 минг доллар)

Одри Givenchy’нинг гипюр матосидан тикилган нафис либосида «Рим таътили» фильми учун «Оскар»ни қўлга киритган. 2011 йилда мазкур либос аукционда 131 минг долларга сотилган.

Энн Хетеуэй (80 минг доллар)

2011 йилги маросимда бошловчилик қилган Энн 80 минг долларлик Valentino либосини кийган. 10 минг долларлик Tiffany & Cо тақинчоғи эса образининг янада ўзига хос кўринишига сабаб бўлган.

Жессика Билл (100 минг доллар)

Актриса 2014 йилги «Оскар» тақдирлаш маросими учун Chanel Couture’дан бисер билан қопланган оқ либос танлаган. Бу образ юлдузга 100 минг долларга тушган.