Бугун,

  • USD 11014.01
  • RUB 191.8
  • EUR 10674.78

Мактабгача таълим вазирлиги Самарқанд шаҳрида 2 ҳафта давомида олиб борилган ўрганиш ишлари натижаларини маълум қилди, деб хабар беради «UzNews.uz».

Фото: «Дарё» / Мадина Нурман

Фото: «Дарё» / Мадина Нурман

Вазирлик ахборот хизмати раҳбари Мавлуда Асқархўжаеванинг сўзларига кўра, шаҳардаги 58-сонли боғчада 141 нафар тарбияланувчи таълим олаётгани хабар қилинган. Аммо амалда бу рақам 186 та экани аниқланган. Гуруҳ қувватлари кичик гуруҳ учун 49 тага, тайёрлов гуруҳи учун 45 тагача оширилган.

Шунингдек, 8 нафар тарбияланувчи боғчадан кетган бўлишига қарамай, улар OpenEMIS тизимидаги рўйхатдан ўчирилмаган. Бу бўш ўринларнинг шакллантирилмаслигига ҳамда гуруҳларга болалар ноқонуний қабул қилинишига сабаб бўлган.

Ушбу боғча директори ташкилотда ишламаган 5 нафар шахсга жами 17 миллион 793 минг иш ҳақи ва унга тенглаштирилган тўловларни берган. Маълум бўлишича, мазкур ташкилот директори 2019 йилда август—сентябрь ойларида 31 нафар тарбияланувчини қалбаки йўлланмалар орқали қабул қилингани сабаб унга нисбатан Самарқанд шаҳар прокуратураси томонидан жиноят иши қўзғатилган.

Бундан ташқари, 7-сонли мактабгача таълим ташкилотида OpenEMIS тизимида 14 та гуруҳда 348 нафар бола кўрсатилган, лекин 12 та гуруҳда 275 нафар бола борлиги маълум бўлган, уларнинг 29 тасида йўлланмалар мавжуд эмас. Бундан ташқари, таъминотчи томонидан МТТга сариёғ ўрнига «Спред» (сут ёғи ўрнини босувчи модда) маҳсулоти олиб келингани аниқланган.

31-МТТда ишчи гуруҳ ўрганишлар олиб бораётган пайтда, ошпаз пишиб турган овқатга хом товуқ гўштини солган, яъни меъёр талабидаги гўшт маҳсулоти пишган овқатда хомлигича қолган.

Шунингдек, вилоятдаги 38-МТТ биносида қулфланган хона борлиги, унда 20 та болалар каравот ва 10 нафар бола борлиги аниқланган. OpenEMIS тизимида 14 та гуруҳда 348 нафар бола бўлиб, ҳақиқатда эса 12 та гуруҳда 275 нафар болани ташкил этмоқда, уларнинг 29 тасида йўлланмалар мавжуд эмас.

Шунингдек, Самарқанд шаҳридаги 50, 126, 13 ва 98-сонли мактабгача таълим ташкилотлари фаолияти ўрганилганида, уларда ҳам COVID-19 пандемияси қоидаларига риоя этилмагани аниқланган.

Ўрганиш натижаларида мактабгача таълим вазири иштирокида фаолиятида камчиликка йўл қўйган мудиралар билан танқидий-таҳлилий учрашув ўтказилган, айримлари билан меҳнат шартномаси бекор қилинган.

Аввалроқ Намангандаги боғча тарбияланувчиси иссиқ сувдан куйиб вафот этиши ортидан МТТ директори ва бир неча ходим ишдан бўшатилгани, Сурхондарёда болаларга қўпол муносабатда бўлган тарбиячи ишдан олингани, Фарғонада 2 туп чинор ва бир туп толни ноқонуний кестирган боғча мудирасига 15 миллион сўм жарима ёзилгани тўғрисида хабар берилганди.

Изоҳ
Асосий янгиликлар