Американинг Россиядаги элчиси Жон Салливан Кремлнинг маслаҳатлашувлар учун Вашингтонга жўнаб кетиш ҳақидаги тавсияларига қарамай, мамлакатни тарк этишдан бош тортмоқда, деб ёзади «РБК».

Жон Салливан

Фото: «РИА Новости»

Axios портал вазиятдан хабардор манбаларига таяниб маълум қилишича, Салливан агар Россия президенти Владимир Путин унинг кетишини хоҳласа, уни мажбур қилишига тўғри келишини айтган.

АҚШ Давлат департаменти бу ахборотни изоҳлашдан бош тортган. Аммо кейинроқ Axios нашри Давлат департаменти вакилига таяниб, АҚШнинг Россиядаги элчиси Жон Салливан шу ҳафта Вашингтонга жўнаб кетиб, у ерда бир неча ҳафта туриши, сўнг эса яна қайтиб келишини маълум қилди.

«Шу ҳафта элчи Салливан ўз оиласи билан кўришиш ва янги маъмурият аъзолари билан учрашиш учун АҚШга қайтиб боради, улар билан ҳали маслаҳатлашиш имкониятига эга бўлмаган эди», — деган Давлат департаменти вакили.

Москва ва Вашингтон ўртасидаги муносабатларнинг кескинлашуви сўнгги марта 15 апрель куни, Америка президенти Жо Байден Россияга нисбатан янги санкциялар киритганидан кейин юз берди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ. Оқ уй февраль ойида Россиянинг ушбу ҳаракатлари учун АҚШ расмийлари унга қарши санкциялар режалаштираётганини айтганди.

Шунингдек, АҚШ мамлакатдан 10 нафар россиялик дипломатлар чиқариб юборилиши ҳақида эълон қилди. Польша АҚШнинг Россияга қарши санкцияларини қўллаб-қувватлади. Польша Варшавадаги уч нафар россиялик дипломатни persona non grata деб эълон қилди, улар мамлакатдан чиқариб юборилади. Россия Ташқи ишлар вазирлиги бунга худди шу тарзда жавоб қилишини маълум қилди.

Ушбу воқеалар ортидан Салливан Россия ТИВга «оғир мулоқот» учун борди, у ерда президент ёрдамчиси Юрий Ушаков унга маслаҳатлашувлар учун Вашингтонга қайтиб кетишни тавсия қилди. Бундан ташқари, Ушаков Салливанга Москванинг АҚШ янги санкцияларига жавоб чораларини баён қилди.