Шавкат Мирзиёев Самарқандга қилган сафарини якунлаб, Тошкентга қайтиб келди

Шавкат Мирзиёев Самарқанд вилоятига икки кунлик сафарини якунлаб, Тошкентга қайтиб келди, дея хабар бермоқда Президент матбуот хизмати.

Сафар давомида Президент Самарқанд халқаро аэропортидаги қурилиш ишларини, Имом Бухорий ёдгорлик мажмуасини кенгайтириш бўйича амалга оширилаётган ишларни кўздан кечирди. Шунингдек, Самарқанднинг Қорасув мавзесида қурилган кўп қаватли уйларни ва туризм марказини бориб кўрди.

Шу билан бирга, Шавкат Мирзиёев Ўзбекистоннинг Биринчи Президенти Ислом Каримов қабрини зиёрат қилди.

Бундан ташқари, вилоятда ташкил қилинган янги корохона ва бошқа саноат фабрикаларини кўздан кечирди. Хусусан, «Ургут» эркин иқтисодий зонасидаги корхоналар фаолияти билан танишди, Sag Agro масъулияти чекланган жамиятининг «in vitro» лабораториясини бориб кўрди.  Шундан сўнг Президент вилоят фаоллари билан йиғилишда иштирок этди.

Йиғилишда «Ургут» ЭИЗнинг янада ривожланиши ҳамда СамДУнинг Ургут филиали очилиши, Самарқанд вилоятига оилавий тадбиркорлик учун 900 миллиард сўм кредит ажратилиши маълум қилинди. Президент, шунингдек, йиғилишда Самарқанддаги Пахтачи туманининг номини ўзгартиришни таклиф қилди.

Президент сафарни Самарқанддаги шифохонада даволанаётган Ўзбекистон Қаҳрамони Ҳасан Нормуродовни бориб кўриш билан якунлади.