Ўзбекистонда ҳайвонлар учун COVID-19 вакцинаси синовдан ўтказилади

Россия томонидан ишлаб чиқарилган ҳайвонлар учун мўлжалланган коронавирусга қарши вакцина синовлари Ўзбекистонда ҳам ўтказилиши режалаштирилмоқда. Бу ҳақда «Халқ сўзи Online» хабар қилди.

Қайд этилишича, айни пайтда олимлар мазкур вакцина билан эмлангандан кейин ҳайвон танасида коронавирусга қарши иммунитет қанча вақт сақланишини ўрганмоқда. Мавжуд маълумотларга кўра, унинг энг кам муддати олти ой. Оммавий ишлаб чиқариш апрель ойи охирларида бошланиши кутилмоқда.

Ветеринария ва чорвачиликни ривожлантириш давлат қўмитаси мутахассислари ва қўмита ҳузуридаги Ҳайвон касалликлари ташхиси ва озиқ-овқат хавфсизлиги давлат илмий маркази олимлари россиялик ҳамкасблари билан мазкур вакцинанинг синов жараёнларини Ўзбекистонда ҳам ўтказиш бўйича музокаралар олиб бормоқда.

Вакцинанинг биринчи босқич синов жараёнлари юқори самара берса, иккинчи босқич синов жараёнлари Ўзбекистонда ҳам ўтказилади.

Вакцинани оммавий ишлаб чиқариш апрелдаёқ бошланиши мумкин. Греция, Польша, Австрия, АҚШ, Канада ва Сингапур компаниялари аллақачон дорига қизиқиш билдирган.

Вакцинанинг клиник синовлари 2020 йил октябридан бошлаб ит, мушук, шимол тулкиси, қоракўзан, тулки ва бошқа жониворларда ўтказилган. Вакцина қабул қилган ҳайвонларда 100 фоиз ҳолатларда коронавирусга нисбатан антитаналар ҳосил бўлган.