Фарғона вилояти Учкўприк туманида икки Тожикистон фуқаросига ўлдириш билан таҳдид қилган шахслар ушланди, дея хабар бермоқда Тергов департаменти.
Қайд этилишича, 2021 йилнинг 2 апрель куни соат 17:00 ларда 37 ёшли М.Х. 36 ёшли Ж.У. билан биргаликда Тожикистон фуқаролари 33 ёшли Ж.У. ва 34 ёшли В.М.ни Учкўприк тумани Қирқ қишлоғи ҳудудидаги ташландиқ жойга олиб бориб, таниши 26 ёшли М.А.нинг қарзини беришни талаб қилиб, уларни дўппослаб, ўлдириш билан қўрқитган.
Олиб борилган терговга қадар текширув ҳаракатлари давомида Учкўприк туманида яшовчи М.А.дан Тожикистон фуқаролари Ж.У. ва В.М. 7200 долларлик трикотаж маҳсулотларини сотиб олиб, пулларни бермай келаётгани ҳақида танишлари М.Х. ва Ж.У.га айтиб, гаплашиб қўйиб, қўрқитиб беришларини сўрагани натижасида ушбу жиноят юз бергани аниқланди.
Мазкур ҳолат юзасидан Учкўприк тумани ИИБ ҳузуридаги тергов бўлинмаси томонидан М.Х. ва Ж.У.га нисбатан Жиноят кодексининг 112-моддаси 1-қисми (ўлдириш ёки зўрлик ишлатиш билан қўрқитиш) билан жиноят иши қўзғатилиб, процессуал тартибда ушланган.
Жиноят иши доирасида барча шахсларнинг хатти-ҳаракатларига қонуний баҳо берилиши таъминланиши маълум қилинган. Ҳозирда тергов давом этмоқда.
Бундан аввал Фарғонада фуқаро номига ариза ёзиб, уни қайтариб олиш эвазига 2 минг доллар талаб қилган икки аёл ушлангани, Самарқандда 21 ёшли қизнинг шахсий суратларини тарқатиб юбормаслик эвазига 400 доллар сўраган институт ўқитувчиси қўлга олингани ҳамда Олмазорда вояга етмаган бола тенгдошини пичоқлаб қўйгани ҳақида хабар берилганди.
Изоҳ (0)