Президент Шавкат Мирзиёев раислигида ўтказилган йиғилишда давлат раҳбари ректорларнинг ёшлар билан ишлашдаги фаолиятида мутлақо янги тизим яратилишини таъкидлади, дея хабар бермоқда «Дарё» мухбири.
«Ҳар бир олийгоҳ ён-атрофидаги камида 5-10 тадан шаҳар маҳалласи учун маънавият маркази ва маданият ўчоғи бўлиши керак. Олий ўқув юртлари атрофидаги маҳаллалардаги уюшмаган ёшларни хорижий тиллар, компьютер саводхонлиги, спорт, маданият ва китобхонлик тўгаракларига жалб этади, уларнинг маънавий дунёқарашини шакллантиришга кўмаклашади.
Шунингдек, ўзларига бириктирилган маҳалладаги ‘ёшлар дафтари’даги ёшлар учун олийгоҳларга кириш бўйича бепул тайёрлов курсларини ташкил этади.
Бундан ташқари, уюшмаган ёшлар билан манзилли ишлаш учун юқори курсларда ўқийдиган 2 нафар намунали талаба 1 нафар уюшмаган ёшнинг ижтимоий фаоллигини оширишга ёрдамлашади. Ушбу тизим орқали 135 та олийгоҳ камида ўртача минг нафардан ёшларни қамраб олганда ҳам, камида 100 минг нафар ёшларга ҳаётда ўз ўрнини топишида кўмак бўлади. Шу тизим йўлга қўйилса, шаҳарларда вазият, албатта, ўзгаради, адашган ёшлар сони кескин камаяди», – деди Шавкат Мирзиёев.
Президент мутасадди раҳбарлар бу ишларни қишлоқ жойларидаги коллеж ва техникумларда ҳам йўлга қўйиш кераклигини айтди.
«Абдувоҳидов, Тошқулов, Жўрабоев, Кенжаев 15 кун муддатда биттадан олийгоҳ, техникум ва коллежга ўзлари бориб, ушбу тажрибани намуна сифатида жорий қилади. Бунда, юқори натижа кўрсатган ректор, техникум ва коллеж раҳбарларига 50 фоизгача устама тўлаб бериш тартиби жорий этилади. Абдувоҳидов, Тошқулов ҳар ҳафта олийгоҳ ректорлари, техникум ва коллеж раҳбарларининг ёшлар билан ишлаш фаолиятини муҳокама қилиб боради.
Олийгоҳ ректорлари, техникум ва коллеж раҳбарларининг маҳаллада, ётоқхоналарда, маданият масканларида қилаётган ишлари телевидение ва оммавий ахборот воситаларида ёритилиши керак», – деди давлат раҳбари.
Бундан аввал Шавкат Мирзиёев ижарада яшаётган талабаларга 1 майдан бошлаб ижара тўловининг ярми давлат томонидан қоплаб берилиши, «ёшлар дафтари»даги ёшлар ва меҳрибонлик уйи тарбияланувчиларига ҳайдовчилик гувоҳномасини олиш, бир ойлик ҳарбий хизматни ўташ харажатлари бюджетдан тўлаб берилиши ҳамда 2021 йилнинг 1 май ва 1 июнидан бошлаб тадбиркорлар ва ишсиз ёшларга бир қатор имтиёзлар берилишини маълум қилгани ҳақида хабар берилганди.
Изоҳ (0)