Хорватиянинг кўплаб ҳудудларида содир бўлган кучли қорбўронлар йўллардаги транспортлар ҳаракатини қийинлаштирди. Бу ҳақда Vecernji List нашрига таяниб «Korrespondent.net» хабар берди.
Фото: Pixsell
Мамлакат пойтахти Загреб, шунингдек, Сплит, Риека ва Карловац шаҳарлари қор билан қопланди. Бундан ташқари, қорбўрон Хорватиянинг шимоли-ғарбига — Адриатик денгизи соҳилларидаги Далмация ҳудудигача етиб борди.
Ноқулай об-ҳаво шароити туфайли асосий автомобиль йўлларида катта тирбандликлар ҳосил бўлди, ҳукумат юк ташувчи транспортлар ҳаракатини чеклаб қўйди.
Баъзи шаҳарлар бир неча соат ичида 10 сантиметр қалинликдаги қор билан қопланди. Синоптиклар бундай об-ҳавонинг бир неча кун давом этишини башорат қилмоқда.
Аввалроқ Қозоғистон пойтахти Нур-Султонда қор бўрони содир бўлди. Кучли қор ва қаттиқ шамол туфайли атрофни кўриб бўлмай қолган. Синоптикларнинг хабар беришича, шамол тезлиги сониясига 20 метрни ташкил қилган.
АҚШнинг Колорадо, Вайоминг ва Жанубий Дакота штатларида ҳам кучли қор ва ёмғир ёғди. Шу билан бирга, мамлакатнинг шимоли-шарқидаги баъзи штатларда ёғингарчилик миқдори, тахминан, 70 сантиметрни ташкил қилди.
