Хавфсиз ошхона: ток урганда, куйиш ва пичоқ кесганда нима қилиш керак?

Шошиб таом тайёрлаганда ёки эҳтиётсизлик сабаб оддий куйиш ҳамда кичик тилинишга вақтида эътибор берилмаса, турли жиддий оқибатларга олиб келиши мумкин.

Ҳар қандай ускунанинг хизмат қилиш йили турли бўлади. Турли оқибатларнинг олдини олиш учун техник воситаларни ҳар 10 йилда алмаштириб туринг. Ҳар доим шкаф эшикларини ёпиб юринг. Йўқса сиз ёки яқинларингиз унга урилишингиз мумкин.

• Таом ёки егулик пиширишдан аввал печни тоза ва овқат қолдиқлари қолмаганлигига эътибор қаратинг. Қовурганда, бульон қайнатганда ва овқат тайёрлаш жараёнида эҳтиёт чораларига амал қилинг.
• Сочиқ ва латталарни печдан узоқ жойга қўйинг.
• Пишаётган таомни эътиборсиз қолдирманг. Қандайдир сабаб билан ошхонадан чиқишингизга тўғри келса, таймерда вақт белгилаб қўйинг.

Товадаги ёғ ёнишни бошласа, зудлик билан унинг устини ёпиб қўйинг. Кислород кирмаслигини таъминлаш орқали оловни ўчириш мумкин. Аммо шишадан ясалмаган қопқоқдан фойдаланишга ҳаракат қилганингиз яхши. Оловни сочиқ, латта ёки сув билан ҳам ўчиришга ҳаракат қилманг.

Куйишда биринчи ёрдам

Куйишда тери қизариши, айрим ҳолларда эса пуфак пайдо бўлиши мумкин. Шунчаки қизарган ва бироз оғриқ кузатиладиган жароҳатга уй шароитида биринчи ёрдам кўрсатиш мумкин. Пуфак ва чуқурроқ жароҳатлар кузатилган ҳолатларда эса зудлик билан шифокорга мурожаат қилиш керак.

• Қасқон ёки қозонда таом пиширганда буғдан куймаслик учун қопқоғини эҳтиёт бўлиб, четга қаратиб очинг.
• Қизиган ёғга маҳсулотларни ташламанг, эҳтиёткорлик билан секин-аста қўйиб чиқинг. Печ эшигини очганда ва ёпганда, сочиқ ёки махсус сочиқлар билан ушланг.
• Куйиш ҳолати кузатиладиган бўлса, қўлингизга муздек сувни 3-4 дақиқа оқизиб туринг. Бу оғриқни камайиши ва яллиғланишни енгиллашишига ҳисса қўшади. Ёғ ёрдам бера олмаслиги, муз терини янада жароҳатлаши мумкинлиги сабаб ҳам улардан фойдаланмаслик тавсия қилинади.

Қанчалик, ғалати туюлмасин яхши чархланган пичоқ турли шикастланишларнинг олдини олади. Гап шундаки, ўтмас пичоқ билан мева ва сабзавот ёки бошқа маҳсулотларни кесишга кўпроқ куч сарфланади. Бундай уриниш вақтида эса жароҳатланиш ҳеч гап эмас. Қолаверса, қуйидагиларга амал қилиш ҳам турли кўнгилсизликларнинг олдини олади.

• Пичоқдан хавфсиз фойдаланишни билиш, маҳсулотни бармоқ учларини қайирган ҳолда ушлаш керак.
• Ювишда ҳам пичоқни ўзингиздан узоқроқ тутишга ҳаракат қилинг.
• Қирғичдан фойдаланганда қўллар жароҳатланиши ҳеч гап эмас. Бундай вақтда мева ёки сабзавотни охиригача чиқаришга уринсангиз, қўлингизни тилиб оласиз.
• Консерваланган банкаларни очишдан аввал уларни яхшилаб ювиб олинг, бу орқали сиз жароҳатланган тақдирда ҳам инфекция тушишининг олдини олган бўласиз.
• Ишлаётган вақтида блендердан қўлингизни узоқроқ тутинг ва токдан олганингизга ишончингиз комил бўлганидан кейингина ювинг.
• Печ ва микротўлқинли печ ичига қўйишдан аввал идишнинг қанчалик иссиқликка чидамли эканини текшириб кўринг.

Пичоқ билан кесиб олиш ҳолати кузатиладиган бўлса, ҳушни йўқотмаслик учун ўтириб олинг ва қўлингизни совуқ сувга тутинг. Кейин дока ёки салфеткани жароҳат устига босган ҳолда қўлингизни яна 30 сония совуқ компресс билан ушлаб туринг. Жиддий оқибатларга олиб келиши мумкинлиги сабаб бееътибор бўлмасдан шифокорга мурожаат қилинг.

Теридаги аллергик реакциялар

Айрим маҳсулотларни арчиш давомида кишида аллергик реакция кузатилиши мумкин. Бундай вазиятда биринчи навбатда қўлларни совуқ сувда ювиш, кейин эса аллергияга қарши восита қабул қилиш керак. Агар шундан кейин ҳам ўзгариш юз бермаса, тиббий ёрдамга мурожаат қилиш лозим.

Ток уриши

Хавфсизлик чораси сифатида ошхонадаги техник буюмларни 20 йилдан кейин алмаштириш, розеткаларни ҳам кўздан кечириб туриш керак. Вақтинча ҳушдан кетиш ҳолати кузатилса ёки ток уришининг зарби кучли бўладиган бўлса, тез ёрдам чақириш керак.

Кўзга нарса кириши

Ошхонада қўл билан кўзга тегинмаслик керак. Ёт жисмнинг кўзга кириши кўз шиллиқ қаватини зарарлаб, турли жиддий асоратларга олиб келиши мумкин. Кўзнинг пастки қовоғини тортиб, тоза сув билан ювинг. Кейин юқори қовоқ билан ҳам шундай қилинг. Кўзга иссиқ ёғ сачраганда, совуқ сув оғриқни камайтиришга ҳисса қўшади. Оғриқ ўтиб кетмаса ва кўришда муаммо бўлса, зудлик билан мутахассисга мурожаат қилинг.