Бугун,

  • USD 10940.05
  • RUB 182.26
  • EUR 11121.65

26 март куни АОКАда бўлиб ўтган матбуот анжуманида Уй-жой коммунал хизмат кўрсатиш вазирининг биринчи ўринбосари, «Ўзсувтаъминот» АЖ раиси Соҳиб Саифназаров Ўзбекистонда сув таъминоти масаласи ҳақида гапирди, деб хабар бермоқда Repost.

Фото: asiaterra.info

Фото: asiaterra.info

Унинг айтишича, республикадаги 10 271 та маҳалла ўрганилганда, уларнинг 8006 тасида сув билан таъминлангани, қолган 2265 тасида эса умуман сув таъминоти йўқлиги аниқланган.

«Ўзсувтаъминот» раисининг маълум қилишича, 117 та объектда қурилиш-монтаж ишларини бажариш учун 1,1 триллион сўм маблағ ажратилди ва ушбу маблағлар ҳисобидан 2 минг километрдан ортиқ ичимлик суви тармоғи қурилади. Натижада 694 та аҳоли пунктида яшовчи 876 минг киши биринчи марта марказлаштирилган ичимлик суви билан таъминланади, шунингдек, аҳолининг 2 миллион нафаридада сув таъминоти яхшиланади.

«Қаршида сув кундузи ва кечаси икки соатдан бериларди. 2020 йили амалга оширилган ишлар натижасида 5 та ҳудудда 24 соат давомида сув этказиб беряпмиз», — деган Соҳиб Саифназаров.

Шунингдек, «Ўзсувтаъминот» АЖ раисининг маълум қилишича, 2021 йилда Оқсув–Деҳқонобод сув қувури қурилиши якунига етказилади.  Деҳқонобод тумани аҳолисининг ичимлик суви таъминотини яхшилаш лойиҳаси доирасида 78,8 километр магистрал сув тармоғи қурилди ва вилоятнинг 116 та қишлоқларида 112,8 мингдан ортиқ аҳоли ичимлик суви билан таъминланди.

Бундан ташқари, ҳозирги кунда Жиззах вилоятининг Зарафшон дарёсида қуввати суткасига 100 минг куб метр бўлган сув кўтариш насос станцияси ва суткасига 100 минг куб метр сув тозалаш қувватига эга «Узунбулоқ» сув тозалаш станцияси қурилмоқда.

Матбуот анжуманида таъкидланишича, 2021 йилда ичимлик суви таъминоти ва канализация тизимини яхшилаш бўйича инвестиция лойиҳалари доирасида халқаро молия институтлари иштирокида 250 миллион доллар жалб қилинади. Бу маблағларга 346 километр ичимлик суви таъминоти қувурлари, 17 та ичимлик суви тақсимлаш иншоотлари, 29 та сув омборлари, 10 та сув қувурлари, 132 километр сув қувурлари, 3 та оқава сув тозалаш иншоотлари ва 21 та оқава сув насос станциялари қурилади.

Хусусан, Жаҳон банки кредити ҳисобидан 139 миллион доллар ажратилган «Бухоро вилоятининг Олот ва Қоракўл туманлари аҳолисини ичимлик суви билан таъминлашни яхшилаш» лойиҳаси якунланади.

Матбуот анжуманида қайд этилишича, Тошкент вилоятининг ичимлик суви билан қамрови 265 минг кишини ташкил этиб, бу 60 фоиздан 92 фоизгачадир.

Бундан ташқари, 2021 йилда «Обод қишлоқ» ва «Обод маҳалла» дастурлари доирасида республика аҳолисини ичимлик суви билан таъминлаш бўйича жами 545 та лойиҳа амалга оширилади. Натижада 635 минг аҳоли ичимлик суви билан таъминланди ва 1 миллиондан ортиқ киши биринчи марта марказлаштирилган ичимлик суви билан таъминланади.

Изоҳ
Асосий янгиликлар