Наманганда олиб қочилган Nexia-2 автомашинаси йўл-транспорт ҳодисасига учради, дея хабар бермоқда Ички ишлар вазирлиги матбуот хизмати.

Фото: ИИВ матбуот хизмати

Маълум қилинишича, 2021 йил 21 март куни соат 00:30 ларда, Учқўрғон туманида яшовчи 1979 йилда туғилган фуқаро ариза билан мурожаат қилган.

Аризада фуқаро 2021 йил 20 март куни соат 17:30 ларда, ўзининг бошқарувида бўлган Nexia-2 да Учқўрғон туманидаги касб-ҳунар коллежи ёнида турган вақтида, 23 ёшли йигит автомашинага йўловчи сифатида ўтирганини айтган. Йигит ҳайдовчидан Наманган шаҳрига олиб бориб қўйишини сўраган.

Фуқаро йигитни Наманган шаҳар кўчасига олиб келиб, автомашинадан шахсий эҳтиёжи учун тушган вақтида, йўловчи унинг рухсатисиз автомашинани бошқариб кетганини маълум қилиб, чора кўришни сўраган.

Олиб борилган тезкор қидирув ҳаракатлари натижасида аниқланишича, йигит машинани Норин тумани ҳудудида бошқариб кетаётиб, йўлнинг ўнг четида турган Nexia-2 автомашинаси билан тўқнашув содир этган ва воқеа жойидан кетган.

Натижада иккала автомашина техник шикастланган. Тан жароҳати олганлар йўқ.

Олиб борилган суриштирув ишлари натижасида ушбу жиноятни Учқўрғон туманида яшовчи, 2018 йилда Жиноят кодексининг 168-моддаси 3-қисми (фирибгарлик) билан судланган, 1998 йилда туғилган фуқаро содир этгани аниқланди ва у Наманган шаҳар Давлатобод тумани «Орзу» МФЙ ҳудудидан ушланиб, ундан тегишли кўргазмалар ва жабрланувчига тегишли Samsung русумли уяли телефон аппарати далилий ашё сифатида олинган.

Ушбу ҳолат бўйича Наманган шаҳар ИИО ФМБ томонидан 2021 йил 21 март куни Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.

Бундан аввал Тошкентдаги машина ювиш шохобчасидан олиб қочилган Nexia-3 Андижондан топилгани, Наманганда 4 нафар ўсмир сайр қилиб келиш баҳонасида Spark’ни олиб қочиб, ЙТҲга учрагани ҳамда Бухорода маст ҳолда ҳамқишлоғининг Damas’ини олиб қочган шахс қўлга олингани ҳақида хабар берилганди.