Яқин кунларда Chevrolet Equinox’нинг 2021 йил русумидаги автомобилларга шартнома бериш бошланади. Бу ҳақда «Ўзавтосаноат» акциядорлик жамияти матбуот хизмати раҳбари Зумрад Шожалилова «Дарё»га маълум қилди.
Эслатиб ўтамиз, февраль ойи бошида «Ўзавтосаноат» моделлар қаторини янгилаш стратегияси сабабли Chevrolet Equinox’нинг ҳозирги авлоди ишлаб чиқарилиши тўхтатилганини маълум қилган эди. Шу боис ушбу моделни етказиб бериш бўйича шартномаларни олиш учун аризаларни рўйхатдан ўтказиш ёпилганди.
Компания масъул ходимининг айтишича, Chevrolet Equinox русумидаги автомобилларга шартномалар айнан қайси санадан берилиши ҳозирча аниқ эмас.
«Етказиб бериш билан боғлиқ масалалар кўриб чиқилмоқда. Харидорлар билан шартнома тузиш қачондан бошланиши бир-икки кунда маълум қилинади», – деди Зумрад Шожалилова.
Бундан аввал Ўзавтосаноат» масъуллари «Equinox ва Tahoe’ларнинг юқори нархи орқали Spark ва Nexia каби арзон машиналарни ишлаб чиқаришдаги зарар қопланаётганини маълум қилган эди. Шунингдек, Spark, Nexia, Cobalt ва Lacetti хариди учун шартнома бериш 3 мартдан қайта тикланиши, Chevrolet Onix 9—12 минг доллар атрофида сотилиши кутилаётгани ҳамда UzAuto Motors Lacetti’нинг янги Redline моделини ишлаб чиқаришни бошлагани ҳақида хабар берилган эди.
Изоҳ (0)