Ўзбекистонда 14 март куни коронавирус инфекциясини юқтириб олиш билан боғлиқ 111 та янги ҳолат қайд этилди, дея хабар бермоқда Соғлиқни сақлаш вазирлиги.
Янги касалланиш ҳолатларининг
- 4 таси Андижон вилоятида,
- 1 таси Бухоро вилоятида,
- 1 таси Сурхондарё вилоятида,
- 12 таси Тошкент вилоятида,
- 93 таси Тошкент шаҳрида
коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.
Қайд этиш жоиз, Тошкент шаҳрида касалланиш кўрсаткичлари сўнгги бир ҳафта ичида сезиларли ошган. Хусусан, 9 март куни пойтахтда 11 та янги ҳолат аниқланган бўлса, 10 март куни 71 та, 12 март куни 70 та ва 13 март куни 77 та янги ҳолат қайд этилган.
Умуман олганда, Тошкент шаҳри кўрсаткичининг кескин ошиши инобатга олинмаса, расмий статистика бўйича 2021 йилнинг март ойида коронавирус билан боғлиқ вазият Ўзбекистон учун январь ёки февралга нисбатан енгилроқ кечаётган эди.
Жумладан, январь ва февраль ойининг дастлабки 14 кунида Ўзбекистоннинг Тошкент шаҳридан бошқа ҳудудларида мос равишда 492 та ва 314 та ҳолат аниқланган бўлса, 1—14 март кунлари фақат 129 та касалланиш қайд этилган эди.
Эътиборга молик томони, расмий статистика бўйича Навоий вилоятида 7 февралдан бери, Қашқадарё вилоятида 12 февралдан бери, Наманган вилоятида 19 февралдан бери, Сирдарё вилоятида 27 февралдан бери бирорта касалланиш ҳолати қайд этилмаган.
Маълумот учун, Ўзбекистонда коронавирусга чалинган беморларнинг бир кунлик сони сўнгги бор 2020 йилнинг 24 декабрь куни 100 кишидан ошган эди. Ўшанда ССВ матбуот хизмати бутун Ўзбекистон бўйлаб 112 кишида касаллик тасдиқланганини маълум қилган.
