Россия ташқи ишлар вазири Сергей Лавров коронавирусга қарши «Спутник V» вакцинаси Ўзбекистонда тезлаштирилган тартибда рўйхатга олинганини айтди. Бу ҳақда «РИА Новости» хабар берди.
Фото: «РИА Новости»
«Шу кунларда Ўзбекистон аҳолисини оммавий эмлаш бошланади. ‘Спутник V’ вакцинасини Ўзбекистонда ишлаб чиқариш масаласи кўриб чиқилмоқда, ушбу вакцина Ўзбекистонда тезлаштирилган тартибда рўйхатга олинган. Биз бу борадаги ҳамкорликни жуда қадрлаймиз», — деган у Ўзбекистон ТИВ раҳбари Абдулазиз Комилов билан учрашувдан сўнг ўтказилган матбуот анжуманида.
Лекин Фармацевтика агентлигининг «Gazeta.uz»га маълум қилишича, «Спутник V» вакцинаси фақат сертификациядан ўтган. Сертификация қилиш жараёни ҳар бир олиб кириладиган партия учун амалга оширилади.
Эслатиб ўтамиз, Ўзбекистонда «Спутник V» вакцинасини оммавий қўллаш жараёнига 17 февраль куни рухсат берилган эди.
Ўзбекистонда коронавирусга қарши илк вакцина сифатида Хитойнинг Zhifei Longcom Biopharmaceutical Co. Ltd компанияси билан ҳамкорликда ишлаб чиқарилган вакцина 1 март куни давлат рўйхатидан ўтказилган. Ўзбекистоннинг ҳиссаси ва саъй-ҳаракатларини инобатга олиб, компания ZF 2001 вакцинани бирга яратган ҳаммуаллиф мамлакат сифатида белгилади. Ушбу янги вакцина ZF-UZ-VAC 2001 номи билан ишлаб чиқариш фойдаланишга келишилган.
Хитой компанияси мазкур вакцинани ҳамкорликда ишлаб чиқариш учун Ўзбекистонда фаолият юритаётган бир қатор фармацевтика корхоналари фаолиятини ўрганиб, лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонасини танлаган.
