Abdulaziz Komilov va Rossiya tashqi ishlar vaziri Sergey Lavrov uchrashuv o‘tkazdi
Moskva shahrida 2021-yilning 2-mart kuni amaliy tashrif bilan bo‘lib turgan O‘zbekiston tashqi ishlar vaziri Abdulaziz Komilov Rossiya tashqi ishlar vaziri Sergey Lavrov bilan uchrashuv o‘tkazdi. Bu haqda vazirlik matbuot xizmati xabar qildi.
Ma’lum qilinishicha, uchrashuv chog‘ida vazir O‘zbekiston Prezidenti Shavkat Mirziyoyevning Rossiya tomonini 2021- yili Toshkent shahrida bo‘lib o‘tadigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyaga taklif qilgan maktubini topshirdi.
Tashqi siyosat mahkamalari rahbarlari siyosiy-diplomatik, savdo-iqtisodiy, madaniy-gumanitar va boshqa tomonlarni qiziqtirgan sohalardagi O‘zbekiston – Rossiya munosabatlarining bugungi holati va rivojlanish istiqbollarini muhokama qildi.
Ilgari erishilgan kelishuvlarning ijro jarayoni hamda bo‘lajak oliy va yuqori darajalardagi tadbirlar jadvali ko‘rib chiqildi.
Ta’kidlanishicha, tomonlar O‘zbekiston va Rossiya o‘rtasida doimiy aviaqatnovlarni tiklash masalasini, O‘zbekiston fuqarolarining Rossiya hududiga kirishlari bilan bog‘liq cheklovlarni bekor qilish imkoniyati yuzasidan fikr almashdi.
Vazirlar BMT, MDH, ShHT hamda boshqa xalqaro va mintaqaviy tashkilotlar doirasidagi hamkorlikning turli jihatlari borasida ham so‘z yuritdi.
Afg‘onistondagi bugungi vaziyat, inklyuziv afg‘onlararo muzokaralarni har tomonlama qo‘llab-quvvatlash va Afg‘oniston ishtirokida transport-kommunikatsiya loyihalarini amalga oshirish yo‘lidagi sa’y-harakatlarga alohida e’tibor qaratildi.
Uchrashuv yakunida tashqi ishlar vazirlarining ommaviy axborot vositalari uchun brifingi o‘tkazilib, muzokaralarning natijalari e’lon qilindi va jurnalistlar savollariga javoblar berildi.
Bundan avval Abdulaziz Komilov Qirg‘iziston prezidenti Sadir Japarov bilan uchrashib, unga Shavkat Mirziyoyev maktubini topshirgani, Afg‘oniston prezidenti qabulida bo‘lgani hamda Tojikiston prezidenti Emomali Rahmon bilan uchrashgani haqida xabar berilgandi.
