Олий Мажлис Қонунчилик палатасида 2 март куни ўтказилган «Ҳукумат соати»да Ўзбекистондаги ОТМлар талабаларини турар жой билан таъминлаш борасида олиб борилаётган ишлар ва режалар муҳокама қилинди.
«Дарё» мухбири Миролим Исажоновнинг хабар беришича, тадбирда Олий ва ўрта махсус таълим вазири Абдуқодир Тошқулов айрим талабалар турар жойларидаги шароитлар ҳақида гапираркан, ўзи ҳам бир кеча талаба билан тунаганини гапирди.
«Баъзи олий ўқув юртларидаги ётоқхоналарнинг шароити яхши эмаслигига сабаб шуки, шахсан ректорнинг эътиборсизлиги, олий таълим муассасаси раҳбарининг ўша ётоқхонага кирмаслигидир, бошқа сабаб йўқ.
Ҳар қандай ОТМ шароит яратиш учун пул топа олади. Чунки талабалар турар жойида яшаётган талаба муассаса ҳисоб-китобидан келиб чиқиб, оз бўлса-да, пул тўлайди. 50 минг сўм тўлайди, 80 минг сўм тўлайди... барибир ойига тўлайди. Бу арзимас пул, лекин ўша пулни ўзига сарфласа ҳам, барча жиҳозини тайёр қилиб қўйса бўлади. Чунки электр энергияси ва бошқа харажатлар асосий ҳисобдан тўланади.
Мен бир талабалар турар жойига бориб, бир кеча ётдим. Бир талаба билан унинг хонасида тунни тонгга улаб суҳбат қилиб чиқдик ва ундан бутун сир-асрорни сўраб олдим. Унинг овқатидан едим, ўзим ҳам нимадир олиб келтирдим. Яшаш шароити, санузеллар ҳолати билан танишдим... бир дунё муаммо. Талаба 40 фоиз дарслардан норози. Жами ўқитувчилардан 40 фоизининг бераётган билимидан норози. У қайси олий ўқув юрти эканлигини айтмайман. Чунки ижтимоий тармоқларда нотўғри талқин бўлиши мумкин.
Нега ётоқхонада автомат кир ювиш машиналари турмаслиги керак? Нега қизларимиз шундан фойдаланмаслиги керак?! Ҳамма нарса номига қилиб қўйилган, қизлар ташқарида кир ювади, ташқарида кир ёяди, бунга ҳеч қанча харажат кетмайди, бунга эътибор керак, холос. Бунга шахсан ректор жавобгар ҳисобланади», — деди вазир.
Изоҳ (0)