Ижтимоий тармоқларда Beeple ники остида танилган рақамли рассом Майк Винкелманн томонидан яратилган 10 сонияли видеоролик 6,6 миллион долларга сотилди, деб хабар беради Hi-Tech.Mail.ru.
Фото: Niftygateway
Роликда ерга йиқилган улкан Дональд Трамп тасвирланган. У турли ёзувлар билан қопланган бўлиб, унинг ёнидан одамлар ўтиб кетмоқда (видеони аукцион сайти орқали томоша қилиш мумкин).
2020 йилнинг октябрида майамилик санъат асарлари коллексионери Пабло Родригес-Фрайле видеороликни салкам 67 минг долларга сотиб олганди. Яқинда маълум бўлишича, коллексионер уни 6,6 миллион долларга сотган.
Хариддан олдин рассом Майк Винкелманнинг роликдаги ўзига хос рақамли имзоси блокчейн ёрдамида оригиналликка текширилган. Гап, афтидан, NFT (Non-fungible token) номи билан аталувчи янги рақамли актив тури ҳақида кетмоқда.
NFT пандемия вақтида кескин оммалашиб кетди, чунки инвесторлар ва коллексионерлар орасида фақат рақамли маконда мавжуд санъат асарларига бўлган талаб ошди. NFT жуда ёш технология бўлишига қарамай, мазкур бозорнинг ҳажми сезиларли даражада катта ва истиқболлари ҳам улкан.
