Қорақалпоғистоннинг Хўжайли туманида 3 киши девор босиб қолиши оқибатида ҳалок бўлди. Бу ҳақда Қорақалпоғистон Республикаси прокуратураси хабар берди.
Хўжайли тумани Ички ишлар бўлимига 28 февраль куни соат 13:00 да келиб тушган хабарга кўра, шу куни соат 12:30 да туманнинг «Маданият» МФЙда фуқаро А.А.нинг эски уйини Б.Қ., С.Л. ва Ж.Т. бузаётган пайтда девор қулаб тушиб, уларнинг учови ҳам девор остида қолиб, воқеа жойида ҳалок бўлган.
Ҳолат юзасидан Хўжайли тумани ИИБ ТБ томонидан Ўзбекистон Жиноят кодексининг 257-моддаси 2-қисми «а» банди (меҳнатни муҳофаза қилиш қоидаларини бузиш одам ўлишига сабаб бўлиши) билан жиноят иши қўзғатилиб, дастлабки тергов ҳаракатлари олиб борилмоқда.
Жиноят иши бўйича тергов Қорақалпоғистон Республикаси прокуратураси томонидан назоратга олинган.
Аввалроқ Тошкентдаги Riviera савдо мажмуасининг қурилишида юз берган авария оқибатида тўрт киши ҳалок бўлгани, Tashkent City’даги объектлардан бирининг қурилишида қатнашаётган ишчи саккизинчи қаватдан қулаб қурбон бўлгани ҳақида хабар берилган эди. Шунингдек, Қибрайда бетон заводининг 95 метрлик девори қулаши оқибатида уч киши, Қарши шаҳрида қурилиши битмаган бинодаги темир-бетон конструкциялари қулаши оқибатида бир киши, Деҳқонободдаги қурилаётган дўконнинг бетон плиталари қулаши оқибатида бир киши ҳалок бўлганди.
Изоҳ (0)