O‘z mashinasidan voz kechgan britaniyaliklarga 3 ming funtdan subsidiya taklif etilmoqda

Buyuk Britaniya hukumati eski mashinalaridan voz kechishga rozi bo‘ladigan britaniyaliklarga pul to‘lash bo‘yicha takliflarni tayyorladi, deb yozadi Motor. Bu kabi avtomobil egalari 3 ming funt sterlinggacha pul olishlari mumkin — faqat mablag‘lar yana transport vositalari uchun sarflanishi kerak.

Britaniya shaharlaridagi ekologik vaziyatni yaxshilashga, shuningdek, aholining shaxsiy avtomobillarga bo‘lgan qaramligini kamaytirishga qaratilgan bu kabi dastur bahordan boshlab Koventrida ishga tushadi. Uning doirasida 2016-yilga qadar ishlab chiqarilgan dizel avtomobillar va 2006-yilgacha konveyrdan chiqqan benzinda harakatlanuvchi avtomobil egalariga o‘z transport vositalaridan voz kechish taklif etiladi.

Buning evaziga hukumat eski mashina egalariga 3 ming funt miqdorida subsidiya to‘laydi. Bu pullarni ular jamoat transportidan foydalanishga, karshering yoki taksi xizmatiga, bundan tashqari, ekologik avtomobillar — velosiped va elektroskuterlar xarid qilishga sarflashlari mumkin.

Buyuk Britaniya Transport vazirligining ma’lumotlariga ko‘ra, 2019-yilda mamlakat aholisi o‘zlarining shaxsiy avtomobillarida 574 milliard kilometr yo‘l bosgan, ushbu ko‘rsatkich besh yil oldingi natijalardan 11 foizga ko‘p.

Eslatib o‘tamiz, 2020-yilning iyunida Britaniyada elektromobil foydasiga oddiy mashinasidan voz kechganlarga 7,6 ming dollardan to‘lanishi to‘g‘risida xabar berilgandi.