Тошкент шаҳар ҳокимлиги 13 февраль куни «Мовий гумбазлар» ресторани ёнидаги хиёбонда «Истиқлол» мажмуасида ўрнатиладиган стеланинг жойлашув ўрни макетини олиб келди. Ҳокимлик матбуот хизматининг ёзишича, жамоатчилик вакиллари хиёбонга келиб, макет билан танишиши мумкин.

Фото: Тошкент шаҳар ҳокимлиги матбуот хизмати

Фото: Тошкент шаҳар ҳокимлиги матбуот хизмати

Фото: Тошкент шаҳар ҳокимлиги матбуот хизмати

Фото: Тошкент шаҳар ҳокимлиги матбуот хизмати

Эслатиб ўтамиз, Ўзбекистон мустақиллигининг 30 йиллигига бағишлаб «Истиқлол» мажмуасини қуриш ва унда «мустақилликнинг моҳияти ва улкан тарихий аҳамиятини акс эттирувчи монументал композиция»ни яратиш Президентнинг 2020 йил 17 декабрдаги фармонида кўзда тутилган эди. Мажмуани барпо этиш жойи сифатида Шароф Рашидов, Ислом Каримов ва Афросиёб кўчалари оралиғида, Марказий универмаг (ЦУМ) қаршисидаги ҳудуд танланган.

11 январь куни Шавкат Мирзиёев банклар 2021 йилда амалга оширишни режалаштирган йирик инвестиция лойиҳаларининг тақдимоти билан танишган, «Gazeta.uz» улар орасида тақдимотга кўра, «ЦУМ» қаршисида жойлашган мажмуа лойиҳаси борлигига эътибор қаратганди.

Фото: «Gazeta.uz»

Бу халқ орасида кенг муҳокамага ва норозиликларга сабаб бўлди. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчаклардан одамлар дам олиш учун келишини таъкидлаган. Шундан сўнг Тошкент шаҳри аҳолиси «ЦУМ» қаршисидаги боғни ҳимоя қилиш учун имзо йиғишни бошлади. 10 февраль куни Тошкентдаги «ЦУМ» қаршисидаги боғ ҳимояси йўлида тўпланган имзоларнинг биринчи қисми Президент Халқ қабулхонасига топширилди.

Пойтахт ҳокимлиги Тошкент шаҳар Экология ва атроф-муҳитни муҳофаза қилиш бошқармаси томонидан «Истиқлол» мажмуаси барпо этилиши белгиланган ҳудуддаги кўп йиллик манзарали дарахтларни сақлаб қолган ҳамда ҳозирги хиёбон фаолиятига таъсир қилмаган ҳолда барпо этилиши, барча дарахтлар хатловдан ўтказилиши ва муҳофазага олинишини маълум қилди.

13 февраль куни бу масала юзасидан жамоатчилик вакиллари билан бўлиб ўтган учрашувда Тошкент шаҳар ҳокими Жаҳонгир Ортиқхўжаев «Истиқлол» мажмуаси мустақилликнинг рамзини акс эттирувчи стела барпо этилишини кўзда тутиши, бошқа ҳеч қандай қурилиш иншоотлари бўлмаслигини, боғдаги бир дона дарахт кесилса, ўша куниёқ лавозимимдан кетишини айтди.

Шунингдек, «Истиқлол» мажмуасида ўрнатиладиган стеланинг жойлашув ўрни макети тақдим этилиши билдирилганди.