Болливуднинг энг ёрқин жуфтлиги Абҳишек Баччан ва Айшвария Рай иштирокидаги сара фильмлар (видео)

2000 йилларнинг бошида суратга олиш майдончасида танишган Айшвария ва Абҳишек бир-бирига кўнгил қўйгунига қадар дўстона муносабатда бўлган. Жуфтликни нафақат никоҳ ришталари, балки бирга иштирок этган бир қанча лойиҳалар ҳам боғлаб туради.

«Севги ҳақида бир нечта сўз»

Актёрлар илк бор бирга иштирок этган ушбу фильм 2000 йилда суратга олинган. Унда капитан ролини ижро қилган Абҳишек таътилда севган қизининг ёнига боради.

Аммо йўлида Айшвария гавдалантирган қизни зўравонлардан қутқаришига тўғри келади ва бу севги ҳикоясининг бошланиши бўлади.

«Айтмасанг ҳам биламан»

2003 йилда суратга олинган мазкур оилавий драмада Раж исмли йигит опасининг унаштирув маросимида Намрита исмли қиз билан танишади.

Аммо қиз турмушга чиққан ва бундан 7 йил аввал турмуш ўртоғи уни бесабаб тарк этган бўлади. Ўғлини ёлғиз катта қилаётган Айшвария ижросидаги қаҳрамон, йигитга имкон беришдан чўчийди. Ҳаммаси энди изига тушаётганида қизнинг собиқ турмуш ўртоғи пайдо бўлади.

«Банти ва Бабли»

2005 йилда суратга олинган фильмда ҳаётини ўзгартиришга қарор қилган жуфтлик ролини Абҳишек ва Рани Мукержи ижро қилган.

Айшвария Рай эса рақс саҳналаридан бирида чиқиш қилиб фильмни янада қизиқарли бўлишига ҳисса қўшган.

«Умрао Жаан»

2005 йилда суратга олинган мазкур фильм сюжет жиҳатидан бошқаларидан фарқ қилади. Умрао исмли қиз болалигида ўғирлаб кетилиб, Лакнаудаги ишратхонага сотиб юборилади.

Аммо гўзаллиги ва ақли билан бошқалардан ажралиб турадиган қиз ўз бахти ва севгиси учун курашади.

«Тезлик 2»

Ушбу фильмда актриса Ритик Рошан билан бирга жуфтлик ролини, Абҳишек эса иккинчи даражали қаҳрамон ролини ижро қилади. Абҳишек гавдалантирган Жай исмли полициячи халқаро ўғрини қўлга олиш учун Айшвария Рай ижросидаги қаҳрамон ёрдамидан фойдаланмоқчи бўлади.

Аммо қаҳрамонлар ўртасида пайдо бўлган севги воқеалар ривожини бошқача тус олишига олиб келади.

«Гуру мадрас хотиралари»

Кичик бир қишлоқда яшайдиган Гурукант исмли йигит муваффақиятга эришиш ва юқори чўққиларни забт этиш мақсадида рафиқаси билан шаҳарга қараб йўл олади.

Бизнесда ўз ўрнини топиш учун бошидан турли воқеалар кечирган, ўз компаниясига асос солган Гуру бошқаларга ўзини ким эканини исботлашга ҳаракат қилади.

«Саркар Раж»

2008 йилда суратга олинган фильмда Баччанлар оиласининг деярли барча аъзоларини учратиш мумкин. Халқаро фирманинг раҳбари бўлган Айшварияга Махараштра қишлоғида электростанция қуриш таклифи келиб тушади.

Лойиҳага розилик берган қизнинг рақиблари эса уни йўлдан олиб ташлаш учун қўлидан келган ҳамма нарсани бажаришга ҳаракат қилади. Ушбу қаршилик бора-бора хавфли сиёсий ўйинга айланади.

«Ёвуз» 

2010 йилда суратга олинган ушбу фильм ўзига яраша қизиқ сюжетга эга. Классик ҳинд рақс ўқитувчиси Рагинининг турмуш ўртоғи Дев полиция ходими бўлиб ишлайди.

Бира исмли қаҳрамон синглисининг қасдини олиш учун Рагинини ўғирлаб кетади ва чангалзорга яширинади. Эри уни қутқариш учун маҳаллий отрядни жалб қилган бир вақтда Рагини ёвуз қаҳрамонга кўнгил қўйишга улгурган бўлади.