Наманган вилоятида икки кишини сохта ҳужжатлар билан Россияга юбормоқчи бўлган шахслар қўлга олинди, дея «Дарё»га хабар бермоқда Бош прокуратура.
Қайд этилишича, Бош прокуратура ҳузуридаги Департамент ҳамда ДХХ томонидан Наманган вилоятида ўтказилган тезкор тадбирда фуқаролар Н.Х. ва А.А. пандемия даврида Россияга кириш тақиқланганлигидан фойдаланиб, ушбу давлатга кетиш истагида бўлган икки нафар фуқаронинг ишончига кирган.
Уларга даволаниш учун сохта таклифнома асосида Россияга чиқариб юбориш эвазига 1000 АҚШ доллари ва 5,2 миллион сўмни олиб, қалбаки ҳужжатларни берган вақтида ашёвий далил билан ушланган.
Мазкур ҳолат юзасидан Жиноят кодексининг 168 (фирибгарлик) ва 228-моддалари (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Сурхондарёда жияни номига 4,5 сотих ерни аукционсиз ажратиб, уни 180 миллион сўмга сотмоқчи бўлган туман қурилиш бўлими бошлиғи, Фарғонада 8 гектар ер олишда ёрдам бериш эвазига 8 минг доллар олган собиқ кадастр ходими ҳамда Қашқадарёда ўқишга киритиб қўйишни ваъда қилиб, 22 кишини 22,5 минг долларга чув туширган фирибгарлар қўлга олингани ҳақида хабар берилди.
