Тошкентда 9 ёшли қизнинг телефонини тортиб олиб, ҳодиса жойидан қочиб кетган жуфтлик қўлга олинди, деб хабар беради Тергов департаменти.
Фото: Тергов департаменти
Маълум қилинишича, 3 февраль куни соат 16:00 ларда номаълум шахслар Яккасарой тумани Чўпон ота кўчасининг поезд темир йўли билан кесишган чорраҳаси яқинида вояга етмаган 9 ёшли Арина Т.нинг қўлида бўлган 2,1 миллион сўмлик Redmi 8 Лите русумли уяли телефон аппаратини қўлидан юлиб олиб, ҳодиса жойидан қочиб кетган.
Олиб борилган терговга қадар текширув ҳаракатлари натижасида мазкур жиноятни фуқаро 21 ёшли Шаҳзод Б. ва Шоҳиста Б.лар содир этгани аниқланган.
Ҳолат юзасидан Яккасарой тумани ИИО ФМБ ҳузуридаги Тергов бўлими томонидан Шаҳзод Б. ва Шоҳиста Б.га нисбатан Жиноят кодексининг 166-моддаси 2-қисми «в» банди (талончилик) билан жиноят иши қўзғатилиб, олиб борилган тергов ҳаракатлари давомида ўғирлаб олинган уяли алоқа телефон аппаратини улар «Малика» савдо мажмуасида 550 минг сўм пул эвазига сотиб юборгани маълум бўлган. Бундан ташқари, жиноятни содир этишга вояга етмаган шахс ҳам жалб қилингани аниқланган.
Ҳозирги вақтда юқорида кўрсатиб ўтилган шахсларга нисбатан Жиноят кодексининг 166-моддаси 2-қисми «в» банди (талончилик) ва 127-моддаси 3-қисми (вояга етмаган шахсни ғайриижтимоий хатти-ҳаракатларга жалб қилиш) билан айб эълон қилиниб, ҳар бирига нисбатан гаров эҳтиёт чораси қўлланилган. Тергов ҳаракатлари давом этмоқда.
Аввалроқ Андижонда 3 нафар мактаб ўқувчисини алдаб, уларнинг зирагини ечиб олган аёл ушлангани тўғрисида хабар берилганди.
