Toshkentda 9 yoshli qizning telefonini tortib olib, hodisa joyidan qochib ketgan juftlik qo‘lga olindi, deb xabar beradi Tergov departamenti.
Ma’lum qilinishicha, 3-fevral kuni soat 16:00 larda noma’lum shaxslar Yakkasaroy tumani Cho‘pon ota ko‘chasining poyezd temiryo‘li bilan kesishgan chorrahasi yaqinida voyaga yetmagan 9 yoshli Arina T.ning qo‘lida bo‘lgan 2,1 million so‘mlik Redmi 8 Lite rusumli uyali telefon apparatini qo‘lidan yulib olib, hodisa joyidan qochib ketgan.
Olib borilgan tergovga qadar tekshiruv harakatlari natijasida mazkur jinoyatni fuqaro 21 yoshli Shahzod B. va Shohista B.lar sodir etgani aniqlangan.
Holat yuzasidan Yakkasaroy tumani IIO FMB huzuridagi Tergov bo‘limi tomonidan Shahzod B. va Shohista B.ga nisbatan Jinoyat kodeksining 166-moddasi 2-qismi “v” bandi (talonchilik) bilan jinoyat ishi qo‘zg‘atilib, olib borilgan tergov harakatlari davomida o‘g‘irlab olingan uyali aloqa telefon apparatini ular “Malika” savdo majmuasida 550 ming so‘m pul evaziga sotib yuborgani ma’lum bo‘lgan. Bundan tashqari, jinoyatni sodir etishga voyaga yetmagan shaxs ham jalb qilingani aniqlangan.
Hozirgi vaqtda yuqorida ko‘rsatib o‘tilgan shaxslarga nisbatan Jinoyat kodeksining 166-moddasi 2-qismi “v” bandi (talonchilik) va 127-moddasi 3-qismi (voyaga yetmagan shaxsni g‘ayriijtimoiy xatti-harakatlarga jalb qilish) bilan ayb e’lon qilinib, har biriga nisbatan garov ehtiyot chorasi qo‘llanilgan. Tergov harakatlari davom etmoqda.
Avvalroq Andijonda 3 nafar maktab o‘quvchisini aldab, ularning ziragini yechib olgan ayol ushlangani to‘g‘risida xabar berilgandi.
Izoh (0)