Тошкент халқаро аэропортида 2021 йилнинг 28 январида бир қизни Туркияга фоҳишалик билан шуғулланиш учун юбораётган икки аёл қўлга олинди.
Фото: ИИВ Тергов департаменти
ИИВ ҳузуридаги Тергов департаменти хабарига кўра, 28 ёшли Шоира Н. ва 32 ёшли Нилуфар Р. Мухлиса исмли қизга Туркиянинг Истанбул шаҳрида фоҳишалик билан шуғулланиш орқали моддий маблағ орттиришни таклиф қилиб, йўлкира ва бошқа харажатларини тўлаб беришни ваъда қилган. Режага кўра, қизни у ердаги жиноий шериклари Наргиза Г. қарши олиши керак бўлган.
Улар қизни Тошкент халқаро аэропорти орқали юбораётган вақтида ҳуқуқни муҳофаза қилувчи орган ходимлари томонидан ушланган.
Ҳолат юзасидан Самарқанд шаҳри ИИО ФМБ ҳузуридаги Тергов бўлими томонидан Шоира Н. ва Нилуфар Р.га нисбатан Жиноят кодекснинг 135-моддаси 2-қисми «э» банди (бир гуруҳ шахслар томонидан олдиндан тил бириктириб одам савдоси билан шуғулланиш) билан жиноят иши қўзғатилган.
Дастлабки тергов давомида Шоира Н. муқаддам шу каби содир қилган хатти-ҳаракатлари туфайли Жиноят кодекснинг 135-моддаси 3-қисми «а» банди (ўғирлаш, зўрлик ишлатиш ёки зўрлик ишлатиш билан қўрқитиш ёхуд мажбурлашнинг бошқа шаклларини қўллаш орқали одам савдоси билан шуғулланиш) билан судланиб, 8 йил муддатга озодликдан маҳрум қилиниб, афв этилганлиги аниқланди.
Ҳолат юзасидан дастлабки тергов ҳаракатлари давом этмоқда.
