Самарқандда рўйхатдан ўтказилган «Шавкат Миромонович Мирзиёев» ва «Жо Байден» корхоналари ўз номини ўзгартирди

Адлия вазирлиги ҳузуридаги Давлат хизматлари агентлиги Ўзбекистон ва АҚШ президентлари номидаги фирмалар рўйхатдан ўтгани ҳақидаги хабарларга изоҳ берди.

Гап Самарқанд вилоятида очилган «Шавкат Миромонович Мирзиёев» оилавий корхонаси ва «Жо Байден» МЧЖ ҳақида кетмоқда. Биринчиси 2020 йил 14 февралда, иккинчиси 2021 йилнинг 21 январида, АҚШнинг янги президенти лавозимига киришган куни рўйхатдан ўтган.

Агентлик «Тадбиркорлик фаолияти эркинлигининг кафолатлари тўғрисида»ги қонунга биноан юридик шахслар ўз ташкилотлари номларини мустақил равишда танлаш ҳуқуқига эга эканлигини эслатади.

Қайд этилишича, 2017 йил 1 апрелдан бошлаб тадбиркорлик субъектларини рўйхатдан ўтказиш автоматлаштирилган тизим орқали амалга оширилади (шахсий иштирокида ёки онлайн тарзда), унда компаниялар номларида ишлатилиши тақиқланган сўзларнинг доимий янгиланадиган рўйхати мавжуд.

«Фирма номлари тўғрисида»ги қонун қуйидагилардан фойдаланишга йўл қўймайди:

• давлатнинг расмий номи, халқаро, ҳукуматлараро ёки нодавлат нотижорат ташкилотининг қисқартирилган ёки тўлиқ номи;
• Ўзбекистондаги тарихий ёки таниқли шахснинг белгиланган тартибда берилган рухсатисиз тўлиқ ёки қисқартирилган исми;
• фирма номи эгаси, фаолият предмети ёки унинг ишлаб чиқарилган мамлакати тўғрисида нотўғри ёки истеъмолчини чалғитишга қодир бўлган белгилар;
• жамият манфаатларига, инсонпарварлик ва ахлоқ тамойилларига зид бўлган белгилар.

Таъкидланишича, икки компания тадбиркорлари билан тушунтириш суҳбати ўтказилган, шундан сўнг компаниялар номлари ўзгартирилган.

«Gazeta.uz» маълум қилишича, Каттақўрғондаги «Шавкат Миромонович Мирзиёев» оилавий корхонаси энди «Тошкент Чилонзор Trade» деб номланади. Барча реквизитлар, фаолият тури ва таъсисчилар рўйхати ўзгаришсиз қолди.

Шунингдек, Самарқанднинг яна бир компанияси – «Жо Байден» энди «White Эагле 070» деб номланади.

Маълумот учун, 2019 йил августида эса Тошкентда «Любая бизнес хороша» номли масъулияти чекланган жамият ташкил этилган эди. КТЯДР маълумотларига кўра, корхона маиший электр товарлар улгуржи савдоси билан шуғулланади.

2020 йил июнида Сурхондарёда «Вой Мани Окахонларим» номли, йирик шохли қорамолларнинг сут берадиган зотларини кўпайтириш билан шуғулланувчи оилавий корхона рўйхатдан ўтказилган эди. Кейинчалик корхона номи «Акбар Али Адолат» деб ўзгартирилган. 2020 йил майида Жиззах вилоятида «Вапше маладес бала» номли кенг ассортиментдаги товарлар улгуржи савдоси бўйича агентлар фаолияти билан шуғулланувчи компания рўйхатдан ўтказилгани маълум бўлган эди.