Бугун,

  • USD 11095.31
  • RUB 173.84
  • EUR 10772.44

Индонезиянинг Sriwijaya Air компаниясига тегишли, 9 январь куни ҳалокатга учраган Boeing 737-500 самолётининг қулашига двигателлар назорати билан боғлиқ муаммолар ва учувчиларнинг уларни бартараф қилишга уриниши сабаб бўлган бўлиши мумкин. Бу ҳақда The Wall Street Journal текширув тафсилотларидан хабардор одамларга таяниб хабар берди, деб ёзади «РБК».

Фото: Getty Images

Фото: Getty Images

Бортда бўлган иккита «қора қути»дан бирининг борт ўзиёзарларидан олинган маълумот шундан дарак берган. Олинган ахборотга кўра, самолётда иккита двигателдан бирининг тортувчи автомати ишламай қолган.

Йўриқномага кўра тизим ўчирилиши керак эди, аммо экипаж муаммони бартараф қилишга уринган. Нашр қайд этишича, двигателларни бошқариш тизими билан боғлиқ бундай носозликлар уларнинг ҳар хил қувват билан ишлашига олиб келади, оқибатда самолётни бошқариш қийинлашади, бу эса учувчиларни хавфсиз парвозни таъминлашдан чалғитади.

Индонезия Транспортдаги хавфсизлик қўмитаси раҳбари ўринбосари Харио Сатмико маълум қилишича, текширувчилар ҳалокат тафсилотларини тушунтириб бера олиши мумкин бўлган иккинчи борт ўзиёзарини қидирмоқда. У терговчилар тортувчи автомат билан боғлиқ муаммо вариантини кўриб чиқаётганини тасдиқлади.

Манбалардан бирининг айтишича, ушбу Boeing самолётининг бундан аввалги парвозини бошқарган учувчилар ҳам шунга ўхшаш муаммоларга дуч келган. Sriwijaya Air бунга изоҳ берганича йўқ.

Авиаҳалокат 9 январь куни содир бўлди, лайнер Мале ороли яқинидаги Яван денгизида ҳалокатга учради. Унинг бортида 62 киши: 50 нафар йўловчи, шу жумладан, ўн нафар бола, шунингдек, 12 нафар экипаж аъзоси бор эди, уларнинг барчаси ҳалок бўлди.

SJ182 рейсини амалга ошираётган лайнер Индонезиянинг Ғарбий Калимантан провинцияси маъмурий маркази бўлган Понтианак шаҳрига йўл олган. Самолёт маҳаллий вақт билан соат 14:36 да Жакартадан учиб чиққанидан кейин дарҳол радарлардан ғойиб бўлган ва диспетчерларга жавоб бермай қўйган.

Кейинроқ Метеорология, иқлим ва геофизика агентлиги вакили Дени Септиади самолёт кучли турбулентлик зонасига тушиб қолганини маълум қилди.

Транспортда хавфсизлик бўйича миллий комиссиянинг авиация хавфсизлигини текшириш бўлими раҳбари Нуркахио Утомо Boeing 737-524 йўловчи самолёти сувга урилиш оқибатида парчаланиб кетган бўлиши мумкинлигини маълум қилди.

Мутахассисларнинг таъкидлашича, самолётнинг ҳалокатга учрашига унинг пандемия сабаб бир неча ой парвозсиз туриб қолгани ҳам сабаб бўлган бўлиши мумкин.

Изоҳ
Асосий янгиликлар
Маҳаллий
Нукус воқеаларида айбланаётганлар суди давом этмоқда: асосий гумонланувчилардан бири иккинчисини фирибгар деб атади
Маҳаллий
Қашқадарёда 3 кунлик фирма 2,6 млрд сўмлик иссиқхона ўрнатиш тендерини ютиб олди
Дунё
Лукашенко Беларусь ташқи ишлар вазири Макей билан видолашув маросимида иштирок этди (фото)