Тошкент шаҳридаги 10 та кўчада автобус, йўналишли такси, тез тиббий ёрдам, ўт ўчирувчи машиналар ҳаракати учун алоҳида ажратилган йўлаклар ташкил этиш режалаштирилмоқда.

Фото: «Дарё»

Пойтахт ҳокимлиги матбуот хизмати хабарига кўра, бу тирбандликларни бартараф этиш ҳамда йўловчиларни ўз вақтида ташишга, шунингдек, фавқулоддаги хизмат машиналари (тез тиббий ёрдам ва ўт ўчириш транспорт воситаларининг) ишларини тезкорлик билан бажаришига ёрдам беради.

Алоҳида ажратилган йўлаклар ташкил этиш режалаштирилаётган кўчалар қуйидагилар:

1. Бобур кўчаси (Халқаро аэропорт бекатидан Сеул кўчаси кесишмаси)

2. Фурқат кўчаси (Сеул кўчасидан Ислом Каримов кўчаси кесишмаси)

3. Кичик ҳалқа айланма йўли (Шота Руставели кўчасидан Фарҳод кўчаси кесишмаси)

4. Фарҳод кўчаси (Кичик ҳалқа айланма йўлидан Лутфий кўчаси кесишмаси)

5. Лутфий кўчаси (Фарҳод кўчасидан Муқимий кўчаси кесишмаси)

6. Муқимий кўчаси (Лутфий кўчасидан Шота Руставели кўчаси кесишмаси)

7. Фарғона йўли кўчаси (Қўшкўприк кўчасидан Қўйлиқ ота кўчаси кесишмаси)

8. Истиқбол кўчаси (Нукус кўчасидан Шаҳрисабз кўчаси кесишмаси)

9. Аҳмад Дониш кўчаси (Тошкент ҳалқа айланма йўлидан Нурафшон кўчаси кесишмаси)

10. Себзор кўчаси (Нурафшон кўчасидан Абдулла Қодирий кўчаси кесишмаси)га қадар.

Хабарда айтилишича, алоҳида ажратилган йўлаклар пайдо бўлганидан сўнг ойнинг биринчи ўн кунлигида йўл ҳаракати хавфсизлиги хизмати ходимлари жарималар қўлламасдан, ҳайдовчилар билан профилактик суҳбатлар ўтказишлари лозим бўлади.

Алоҳида ажратилган йўлакларда шахсий автоуловни бошқариш тақиқланиши алоҳида таъкидланган.