Koronavirusni boshdan o‘tkazdim deb o‘ylagan o‘zbekistonlik jurnalist kovid-vaksina sinovi sabab aslida kasallikka chalinmaganini bildi

“Xalq so‘zi” gazetasining saytiga muharrirlik qiluvchi Inobat Ahatova koronavirusga qarshi Xitoy vaksinasining O‘zbekistondagi sinovlarida ko‘ngilli sifatida ishtirok etmoqda. U “Amerika ovozi” muxbiri Navbahor Imomovaga bergan intervyusida u vaksina sinovlariga qadar koronavirusni o‘zida yengil o‘tkazgan, deb o‘ylab yurgani, biroq sinov oldidan o‘tkazilgan tekshiruvlar buning aksini ko‘rsatganini aytib o‘tgan.

O‘zbekistonda 2020-yil noyabr—dekabridan beri koronavirusga qarshi Xitoy vaksinasi (ZF 2001)ning uchinchi bosqich sinovlari davom etmoqda. 12-yanvar holatiga ko‘ra, sinovdagi ko‘ngillilar soni 1751 nafarga yetgan. Umuman, shu vaqtgacha 4773 kishi sinovda ishtirok etish istagini bildirgan.

Koronavirusni boshidan o‘tkazgan fuqarolar, ularning organizmida antitanalar borligi sababli, vaksina sinovida qatnashishi mumkin emas — bu klinik tadqiqot ma’lumotlarining to‘g‘ri chiqishiga xalal berishi mumkin. Rasmiy ma’lumotlarga ko‘ra, sinovda ishtirok etish istagini bildirganlarning 787 nafarida koronavirusga qarshi antitanalar topilgan.

“Xalq so‘zi” vakili Inobat Ahatovaning ta’kidlashicha, u ham o‘zini koronavirusga chalinganlar qatoriga qo‘shib yurgan, chunki u o‘zida kasallik simptomlarini kuzatgan.

“Men koronavirusga chalinganman, kasallikni yengil shaklda o‘tkazdim, deb yurgandim, chunki kasallikning hid, ta’m bilishni yo‘qotish kabi hamma alomatlarini o‘zimda kuzatgan edim. Yo‘q, vaksina sinovi oldidan o‘tkazilgan tekshiruvlarda koronavirusga chalinmaganim ma’lum bo‘ldi”, — deydi Inobat Ahatova.

Jurnalist hozircha vaksinaning birinchi dozasini qabul qilgan. “Hech qanday salbiy holat kuzatilgani yo‘q. Nafaqat menda, bilishimcha, sinovda ishtirok etayotgan boshqa ko‘ngillilarda ham hali jiddiy salbiy oqibat kuzatilgani yo‘q... Oxirigacha shunday bo‘ladi, degan umiddaman”, — dedi u “Amerika ovozi”ga bergan intervyusida.

Inobat Ahatova “Daryo” muxbiri bilan suhbatda koronavirus simptomlarini 2020-yil iyul oyi oxiri—avgust oyi boshlarida o‘zida sezgani, biroq o‘sha vaqtda (sog‘liqni saqlash tizimi, soha mutasaddilarining ta’rifi bilan aytganda, kollaps holatiga yaqinlashib qolgandi) “barchaga ma’lum sabablarga ko‘ra” poliklinikaga murojaat qilmagani, vaksina sinovlariga qadar na PZR uslubida, na antitanalarni aniqlash bo‘yicha test topshirganini ma’lum qildi.