«Бу сир эмас-ку». ССВ раҳбари Ўзбекистондаги умумий ўлим статистикаси «расмий сўров бўлса»гина берилишини маълум қилди

Ўзбекистондаги умумий ўлим ҳолатларига доир статистика «сир эмас», расмий сўров берилса, маълумотлар тақдим этилади. Бу ҳақда соғлиқни сақлаш вазири Абдуҳаким Ҳожибоев «Дарё» мухбири Миролим Исажоновга маълум қилди.

Ўзбекистонда 2020 йил августидан бери умумий ўлим ҳолатлари бўйича расмий статистик маълумотлар эълон қилинмаяпти. Давлат статистика қўмитаси октябрь ойида тўққиз ойлик якунлари бўйича демографик ҳолатга доир ахборотномасида умумий ўлим статистикасини ҳам эълон қилиши лозим эди, бироқ ушбу маълумотлар ҳозирга қадар эълон қилинмаган. 2020 йил учун фақат январь—июль ойларига тааллуқли ўлим статистикаси маълум, холос.

Қўмита ушбу ҳолат юзасидан ноябрь ойида берган изоҳида ўлим статистикасини шакллантириш учун масъул ҳисобланган Адлия вазирлиги ва Соғлиқни сақлаш вазирлиги тегишли маълумотларни Статистика қўмитасига тақдим этмаганини маълум қилган эди. Ўшанда Адлия вазирлиги қўмитанинг бу баёнотини рад этиб, маълумотлар тақдим этилганини билдирган бўлса, Соғлиқни сақлаш вазирлиги ОАВнинг бу борадаги сўровларига жавоб бермаган.

«Дарё» мухбири соғлиқни сақлаш вазири Абдуҳаким Ҳожибоевдан ушбу ҳолат бўйича изоҳ олишга уринаркан, вазир дастлаб «Статистика қўмитасига тегишли саволга жавоб беролмаслиги»ни айтган, мухбир Статистика қўмитасининг даъвосини эслатгач (маълумотлар, хусусан, Ҳожибоев раҳбарлик қилаётган вазирлик томонидан тақдим этилмаган), «расмий сўров берилса, маълумотлар берилиши»ни маълум қилган.

«Бу сир эмас-ку», — дея алоҳида қайд этиб ўтган вазир Ҳожибоев. Мухбир бу каби маълумотлар 2020 йил октябрига қадар расмий сўров берилмаса ҳам эълон қилиб келинганини эслатганида, вазир: «Йўқ, расмий сўров... Агар сиз айтган статистикани кимдир расмий сўраса, маълумот берилади», — деб жавоб берган. Ҳожибоев расмий сўровсиз бу маълумотлар эълон қилинмаслигини алоҳида таъкидлаб ўтган.

Маълумот учун, 2020 йил июлида Ўзбекистонда умумий ўлим кўрсаткичи шу ой учун сўнгги йилларда шаклланган ўртача кўрсаткичдан 26,4 фоизга, Тошкент шаҳрида 166 фоизга, Тошкент вилоятида 43,8 фоизга,Навоий вилоятида 51,7 фоизга юқори бўлган. Тахминан шу вақтда, июль—август ойларида Ўзбекистонда коронавирус пандемияси чўққига чиққан, ўлим ҳолатлари сони кескин кўпайган эди.

Қайд этиш жоиз, Соғлиқни сақлаш вазирлиги томонидан юритилаётган коронавирусга доир расмий статистика маълумотларига кўра, Ўзбекистонда 2020 йил мартидан то 12 январга қадар жами 618 киши коронавирус инфекцияси оқибатларидан вафот этган. Бироқ ССВ Ўзбекистоннинг бошқа давлат органлари эълон қилган коронавирус оқибатидаги кўплаб ўлим ҳолатларини тасдиқламаган. Шунингдек, вазирлик статистикасига Ўзбекистонда вафот этмаган шахс(лар) ҳам киритилган.