Сочлар қалин, киприклар узун, қошлар камон, лаб эса ғунчадек, устига-устак уларнинг ҳаммаси табиий кўринишда бўлса, бу визажистларнинг маҳоратидан дарак беради. Бу борада маникюр ҳақида ҳам шундай дейиш мумкин. Аёллар бармоқларини ва унга мутаносиб равишда тирноқ шаклини узун кўринишини хоҳлаши шубҳасиз. Буни амалга ошириш соҳа мутахассислари учун қийинчилик туғдирмайди, албатта.
Нафис ранглар
Тирноқларни узайтиришда, албатта, тирноқ шакли ва танланган ранг муҳим рол ўйнайди. Бўёқларнинг рангини танлашда тери рангини инобатга олишни ҳам унутмаслик лозим. Бунда оқ-сариқ ранг терига эга қизлар оч пушти ва оч жигарранг бўёқлардан фойдалиниши мумкин. Нисбатан тўқроқ рангдагиси эса буғдой рангдаги тери учун мос келади. Карамел рангдан эса қорачадан келган ҳар қандай хонимлар тирноқларини визуал тарзда узайтириш учун фойдаланиши мумкин. Оқ ранг эса калта тирноқ пластинкасига эга бўлганлар учун умуман тавсия этилмайди.
Қуюқ рангдаги бўёқлар
Фақат табиий узун тирноқ эгаларигина тўқ рангдаги бўёқларни ишлатиши мумкин, деган нотўғри тушунча мавжуд. Аммо тирноқларнинг шаклига қараб тўқ кўк, қизил ва ҳаттоки, қора рангдан ҳам фойдаланиш мумкин. Бунинг учун фақат тирноқ пластинкасининг ён томонини бир-икки миллиметрга бўёқсиз қолдириш керак. Шундагина тирноқлар шакли табиий узундек кўриниш ҳосил қилади.
Ой маникюри
Тирноқларни визуал равишда узайтирувчи энг замонавий усуллардан бири – тирноқ ичига ярим ой безагини беришдир. Тирноқларнинг ички бурчакларига ярим ой шакли очроқ ёки тўқроқ, умуман, тирноқ учун танланган бўёқдан фарқланиб туриши керак. Икки қарама-қарши ранг натижасида тирноқлар узунроқ кўриниши мумкин.
Французча маникюр
Биринчидан, француз маникюри ҳамиша наозкатли кўринади. Иккинчидан, тирноқларни узайтиради. Учинчидан, француз маникюри учун турли хил ранг комбинацияларидан тажриба қилиб кўриш мумкин. Французча маникюр учун қарама-қарши ранг танлаш қийинчилик туғдирмайди, муҳими, улар бир-хил бўлмаслиги керак.
Безаклар
Нақш, тош, кўз, ялтироқлар – буларнинг барчаси тирноқларни узайтириш учун қўл келадиган безаклардир. Энг асосийси, уларнинг сонини ошириб юбормасликка ҳаракат қилиш керак. Масалан, тирноқ бошидан бошлаб юқорига қарата терилган тошлар ҳам уларни узун кўрсатиши мумкин. Бундай безаклар беришда горизонтал чизиқлардан ҳам фойдаланиш мумкин. Муҳими, ранглар ўртасида контраст яратишдир.
Изоҳ (0)