Руминия шимолида ташқи кўриниши билан Стэнли Кубрикнинг «Фазовий саёҳатнома» фильмидагига ўхшаш учбурчак монолит пайдо бўлди. У яқинда АҚШнинг Юта штатидаги саҳрода топилган, сўнгра йўқолиб қолган монолитга ўхшаш, деб хабар беради Meduza.
Кадр: YouTube
Қирралари жимжимадор тасвирларга эга янги монолит 26 ноябрь куни Пьятра-Нямц шаҳридаги Батка Доамней тепалигидан топилган. Daily Mail’нинг ёзишича, монолит археологик диққатга сазовор маскан — эрамиздан аввалги 82 йилдан эрамизнинг 106 йилига қадар қурилган Петродавско-Дакийск қўрғони яқинидан топилган. Монумент баландлиги тўрт метрга етади.
Янги монолит кимга тегишли эканлиги номаълум: у археологик ёдгорликнинг хусусий участкасида жойлашган. Руминия ҳукумати монолитнинг ўрнатилишига ким жавобгар эканлигини билмайди. Амалдорлар сирли топилмани ўрганишни бошлаган.
Эслатиб ўтамиз, 18 ноябрь куни АҚШнинг Юта штатида, тахминан, 3 метр баландликдаги металл монолит топилган эди. Штат жамоат хавфсизлиги департаменти ходимлари вертолётда атрофни кўздан кечираётган вақтида қизил қоядаги катта силлиқ монолитни кўриб қолган.
Сирли объектнинг қаерда экани департамент вакиллари томонидан ошкор қилинмаган. Тахминларга кўра, уни «Самовий саргузаштлар» фильми мухлислари ёки бирор ҳайкалтарош (масалан, шу яқин атрофда яшайдиган минималист Жон Маккракен) ўрнатган бўлиши мумкин.
Қизиқувчан саргузашт изловчилар сунъий йўлдош орқали дарадаги рельефни кўздан кечириб, аномал сояни топишга муваффақ бўлган. Сўнгра монолитни излаб топган. 29 ноябрь куни, америкалик амалдорларнинг айтишича, «номаълум томон» монолитни олиб ташлаган.
