Евроиттифоқнинг бир йўла бир нечта мамлакати ўз ҳудудларида амал қилаётган карантин чораларини Рождество байрамлари даврида сусайтиришга қарор қилди, деб ёзади «Korrespondent.net».
Италия
Италия ҳукуматининг эълон қилишича, 29 ноябрдан бошлаб коронавирусдан, айниқса, кучли жабр кўрган «қизил» ҳудудлар — Ломбардия, Пьемонт ва Калабрия «сариқ» ҳудуд деб ўзгартирилади (бу эпидемиологик хавфнинг пастроқ даражаси). Карантин чораларининг юмшатилиши ҳақида Бельгия, Ирландия ва Германия ҳам маълум қилди.
Италияда Ломбардия, Пьемонт ва Калабрия аҳолиси ўз муниципалитетида 5:00 дан 22:00 гача яна эркин ҳаракатланиши мумкин бўлади. Бундан ташқари, ишга, шифокор кўригига бориш ёки болаларни мактабга олиб бориш учун вилоят ичида сафарга чиқишга ҳам рухсат берилади. Савдо марказларининг қайта очилишига рухсат берилади, аммо бар, ресторан ва нон дўконлари ёпиқ қолади.
Шу билан бирга, Валле-д’Аоста вилояти, Болцано шаҳри (Трентино-Алто-Адидже вилоятида жойлашган), шунингдек, Тоскана, Абруцци ва Кампания провинциялари «қизил» ҳудудлигича қолади. Ушбу ҳудудларда одамларнинг уйдан чиқишига муайян шартлар билангина рухсат этилади.
Ирландия ва Бельгия
Ирландия ҳукумати ҳам Рождество байрамлари даврида бир қатор муассаса ва корхоналар учун чекловларни юмшатишга қарор қилди. Масалан, 1 декабрдан дўкон, музей, бадиий галерея ва кутубхоналар гигиена қоидалари ва ижтимоий масофага риоя қилиш шарти билан очилади. 4 декабрдан эса ресторан ва барлар ҳам ишлашни бошлаши мумкин.
Бельгия бош вазири Александер де Кроо ҳам Рождество байрамлари чоғида дўконларни очишга ваъда берди. «Мамлакатимизда вазият яхшиланмоқда. Аммо шу йўналишда давом этишимиз муҳим», — деди у телевидение орқали мурожаатида. Бу эса Бельгияда қисман локдаун режими сақланишини билдиради.
Германия
Германияда 23 декабрдан 1 январгача, яъни Рождество байрами ва Янги йил арафаси нишонланадиган даврда қоидалар бироз сусайтирилади. Шахсий учрашувларда уй хўжаликлари сонидан қатъи назар, кўпи билан 10 киши қатнаша олади. Шунингдек, ҳукумат мушакбозлик қилишдан воз кечишни тавсия этди ҳамда уларни гавжум майдон ва кўчаларда тақиқлади. Ҳукумат компанияларни шу даврда ўз ходимларини масофадан ишлашга ўтказишга чақирди. Германия тоғ-чанғи курортлари 10 январгача ёпиқ бўлади.
Айни пайтда Германияда 2 ноябрдан буён амал қилиб келаётган чекловларнинг аксарияти сақланиб қолади. Мамлакатда ресторан, бар, театр, кинотеатр, тренажёр заллари, спорт сексиялари, борделлар, массаж салонлари ҳамда кўнгилочар ва хизмат кўрсатиш соҳасидаги бошқа кўпчилик корхоналар ёпиқ қолади.
Баъзи эҳтиёт чоралари ҳатто кучайтирилди. Хусусан, энди нафақат жамоат транспорти, дўкон ва савдо кўчаларида, балки деярли барча ёпиқ жамоат жойларида, шаҳарларнинг марказий ҳудудларида ва мактабларда ҳам (7-синфдан бошлаб) ниқоб тақиш мажбурий бўлди.
Меркельнинг сўзларига кўра, Германияда қисман локдаун мамлакатнинг катта қисмида камида январь ўрталаригача амал қилишини айтди.
Эслатиб ўтамиз, Буюк Британияда 2 декабрь куни коронавирус туфайли жорий қилинган умуммиллий карантин тугайди ва у маҳаллий чекловлар билан ўрин алмашади. Франция ҳукумати эса 28 ноябрдан коронавирус инфекцияси туфайли жорий қилинган чекловларни босқичма-босқич бекор қилишни бошлайди.
Изоҳ (0)