Бугун,

  • USD 11095.31
  • RUB 173.84
  • EUR 10772.44

Франция сенаторлари мамлакат ҳукуматини Тоғли Қорабоғ Республикасини тан олишга чақирувчи резолюция қабул қилди. Бир киши резолюцияга қарши овоз берди, 305 киши уни қўллаб-қувватлади. Бу ҳақда TJournal хабар берди.

Фото: «ТАСС»

Фото: «ТАСС»

Франция Сенати Озарбайжон қуролли кучлари ва уларнинг тарафдорларини 27 сентябрдан бери минтақада ўтказилган ҳарбий ҳаракатлар натижасида тортиб олинган ҳудудлардан зудлик билан олиб чиқиб кетишга чақирди. Сенат Туркия ҳукумати ва чет эллик ёлланма аскарлар кўмагида амалга оширилган Озарбайжоннинг ҳарбий тажовузини қоралади.

Шунингдек, сенаторлар Тоғли Қорабоғда содир этилган ҳарбий жиноятлар юзасидан халқаро тергов ўтказиш зарур деб ҳисоблайди. Ташаббус муаллифлари ҳукуматнинг можарони узоқ муддатли ҳал қилиш бўйича Минск гуруҳи доирасидаги музокараларни қайта тиклашга кўмак беришини талаб қилмоқда.

Сенат қарорида 1994 йилда белгиланган чегараларни тиклаш, Арманистон аҳолиси хавфсизлиги ва кўчирилган одамларнинг қайтиб келиш ҳуқуқини таъминлаш талаб қилинган. Француз қонунчиларининг фикрига кўра, республикани тан олиш Туркиянинг «бутун Франция ва Европа хавфсизлигига таҳдид соладиган» экспансия сиёсатининг олдини олади.

Арманистон бош вазири Никол Пашинян ушбу резолюцияни «тарихий қарор» деб атади. Унинг сўзларига кўра, Тоғли Қорабоғни тан олиш халқаро кун тартибига киради.

Озарбайжон президентининг ёрдамчиси Ҳикмет Гаджиевнинг айтишича, мамлакат расмийлари ушбу қарорга «оддий қоғоз варағи» каби қарамоқда. «Тор сиёсий амбициялар номи билан қабул қилинган ушбу қоғоз халқаро ҳуқуқни, БМТ уставини ва БМТ Хавфсизлик Кенгашининг тегишли қарорларини қўпол равишда бузиш билан бирга, Франциянинг ниятлари ва объектив фаолияти билан боғлиқ жиддий саволларни туғдирмоқда», — деди Гаджиев.

Франция Ташқи ишлар вазирлиги давлат котиби Жан-Батист Лемуаннинг фикрича, Франциянинг Тоғли Қорабоғ мустақиллигини бир томонлама тан олиши ҳеч кимга фойдали бўлмайди. Унинг сўзларига кўра, бу қадам Франция ҳукумати, Ереван ва Парижнинг бошқа шериклари сиёсатини акс эттирмайди.

10 ноябрь куни Арманистон бош вазири Россия ва Озарбайжон раҳбарлари билан биргаликда ўт очишни тўхтатиш ва тинчликпарвар кучларни Тоғли Қорабоғга киритиш тўғрисида уч томонлама битим имзолади. Арманистонда бу таслим бўлиш деб қабул қилинди. 11 ноябрь куни Пашиняннинг истеъфосини талаб қилган кенг миқёсли намойишлар бўлиб ўтди.

Изоҳ
Асосий янгиликлар
Маҳаллий
Ўзбекистонда дам олиш кунлари қандай об-ҳаво бўлади?
Спорт
Томас Мюллер Германия терма жамоасидаги фаолиятини якунлашига ишора қилди
Дунё
«Биз Россия билан урушни хоҳламаймиз, айниқса учинчи жаҳон урушини» — Блинкен