Атрофда «маънавиятга, маърифатга, маданиятимизга бўлаётган хуружларга» қарши соғлом муносабатни шакллантиришда киноижодкорларнинг ўрни катта. Бу ҳақда Президент 20 ноябрь куни «Ўзбекфильм» киностудиясида ўтказилган учрашувда айтиб ўтди.
Аввалроқ Президент киночилар билан мулоқотда ўзбек томошабини фақат чет эл фильмлари ва телесериаллари таъсирига тушиб қолмаслиги кераклигини таъкидлагани ҳақида хабар берилган эди.
«Биласизларми, шиддатли замонда яшаяпмиз. Шу ўринда маънавий нуқтаи назардан, тарбиявий нуқтаи назардан, замонамиздаги жуда катта хуружлар нуқтаи назаридан биз курашга тайёрмизми деган кўндаланг савол туғилади. Минг афсус, тайёр эмасмиз. Ўзимизнинг ички маданиятимиз ўзгариши керак. Иммунитети бўлмаган миллат, халқ ҳеч қачон хуружларга қарши кураша олмайди», — дея киноарбобларга мурожаат қилди Президент.«Ўзбекфильм» студияси хароба ҳолга келиб қолган, кўп жойлари, бинолари ижарага бериб юборилган эди. Президентнинг алоҳида қайд этишича, «бугун буларнинг ҳаммаси ўз эгасига — киночиларга қайтарилди».
«Бу даргоҳни мана шундай кўринишга келтиришимиз биринчи қадамлардан. Сиз зиёлилар сифатида ҳар бир ютуғимизни, муаммомизни кино орқали халққа етказа оласизлар. Айниқса, бугунги пандемия даврида бошдан кечирган қийинчиликларимиз бизни сергак бўлишга ундаётгани рост. Одамларнинг онгини ўзгартиришимиз керак. Изланишда бўлмасак, ўзимизни қийнамасак, ўқимасак, билимга ташна бўлмасак натижа яхши бўлмайди», — дея қўшимча қилди Шавкат Мирзиёев.