Қибрайдаги хонадонда юз берган газ портлашининг сабаби маълум қилинди. Ҳолат юзасидан жиноят иши қўзғатилди

Тошкент вилоятининг Қибрай туманида жойлашган уйларнинг бирида 21 ноябрь куни газ портлаши оқибатида икки киши ҳалок бўлганлиги ҳақида хабар берилганди. Бош прокуратура томонидан маълум қилинишича, мазкур ҳолат юзасидан жиноят иши қўзғатилди.

Бош прокуратура хабарига кўра, мазкур ҳолат юзасидан Тошкент вилояти прокуратураси ўтказган терговга қадар текширишда газ чақнаши юз берган уй ёнида ўрнатилган юқори босимли газ тақсимлаш мосламаси (ГТМ)га уланган ва ер остидан ўтказилган полиэтилен газ қувурининг монтаж ишлари ўта сифатсиз амалга оширилганлиги аниқланган.

Бунинг оқибатида уйга яқин оралиқдаги ер остидаги полиэтилен газ қувурининг уланиш қисмида ёриқ юзага келиб, ундан табиий газ сизиб чиқиб, хонадон ертўласида тўпланган ва газ чақнаши содир бўлган.

Мазкур ҳолат юзасидан 2020 йил 23 ноябрь куни Тошкент вилояти прокуратураси томонидан Жиноят кодексининг 258-моддаси (тоғ-кон, қурилиш ёки портлатиш ишлари хавфсизлиги қоидаларини бузиш) билан жиноят иши қўзғатилди.

Ҳозирда Тошкент вилояти ИИББ ҳузуридаги Тергов бошқармаси томонидан дастлабки тергов ҳаракатлари олиб борилмоқда.