Ўзбекистонда талабалар таълим муассасаларига бора олмаса, масофавий ўқишни давом эттириши мумкин. Бу ҳақда 14 ноябрь куни бўлиб ўтган матбуот анжуманида Олий таълим муассасалари фаолиятини мувофиқлаштириш бош бошқармаси бошлиғи Абдували Холиқов маълум қилди.
«Барча талабаларни талабалар турар жойлари билан таъминлаш имкони йўқ. Олий таълим муассасаси ҳеч бир талабани турар жой билан таъминлашга кафолат бермайди. Турар жой билан боғлиқ масалани ҳал қила олган талабалар анъанавий таълимга қайтади», — деган Олий таълим вазирлиги вакили.
Унинг айтишича, маълум бир талабалар турар жойларида ҳозирда таъмирлаш ишлари олиб бориляпти. Ётоқхона билан биринчи навбатда кам таъминланган, меҳрибонлик уйи битирувчилари таъминланади.
Абдували Холиқов, шунингдек, талабаларни баҳолашда мезонлар бир хил, аммо вақти бир хил бўлишга мажбур эмаслиги, масофадан ўқиётган талаба вазифани кечроқ тайёрлаб берса, ўқитувчи уни кечроқ ҳам баҳолаши мумкинлигини таъкидлаб ўтган.
Эслатиб ўтамиз, Ўзбекистон олий таълим муассасаларида 2020/2021-ўқув йили 2 сентябрдан масофавий шаклда бошланганди. Сентябрь ойининг бошида Олий ва ўрта-махсус таълим вазирлиги матбуот котиби Фарҳод Бабашев Ўзбекистон ОТМларида анъанавий таълим шакли 2021 йилнинг январь—февраль ойларида иккинчи семестр бошланиш вақтида қайта тикланиши мумкинлигини айтганди.
Республика комиссиясининг 2020 йил 12 ноябрдаги йиғилиши қарорига мувофиқ, барча олий таълим муассасаларида 2020 йилнинг 16 ноябридан олий таълим муассасаси томонидан ишлаб чиқилган чора-тадбирлар ва режа-график асосида ўқув жараёнини анъанавий шаклда давом эттириш белгиланди.
Изоҳ (0)