Samsung компанияси пандемия давом этаётганига қарамай, жуда тез қайта «оёққа турмоқда». Смартфонлар ишлаб чиқариш бўйича жаҳон етакчиси охирги чоракда Ҳиндистондаги савдолар бўйича Xiaomi’дан биринчи ўринни олиб қўйди. Маълум бўлишича, ҳозирда Samsung Apple’ни ҳам ортда қолдириб, АҚШдаги энг йирик смартфон ишлаб чиқарувчига айланган, деб хабар беради IXBT.
Strategy Analytics маълумотларига кўра, Samsung уч йил деганда биринчи бор ниҳоят Apple’дан ўзиб кетган. Бунга бир нечта сабаблар бор, улардан энг муҳими — iPhone 12 сериясига кирувчи янги смартфонлар тақдимотининг кечиккани. Смартфонлар узоқ танаффус билан сотувга чиққан, шу билан бирга, iPhone 12 мини ва iPhone 12 Prо Мах шу ҳафтадан сотувга чиқади.
Samsung ўтган чоракда Америка бозорининг 33,7 фоизини эгаллаган, Apple эса 30,2 фоиз натижа билан иккинчи ўринда. Учинчи ўрин Жанубий Кореянинг яна бир компанияси — LG’га насиб этган (14,7 фоиз).
Samsung 6,7 фоиз ўсишга муваффақ бўлган. Муваффақиятлар турли нарх ва техник тавсифга эга рақобатбардош моделлар сабаб таъминланган. Шунингдек, Galaxy Note 20 ва Note 20+ ҳам яхши сотилган. Эгилувчан Galaxy Z Fold2 модели ҳам ёмон натижа кўрсатмаган.
Эслатиб ўтамиз, Samsung сўнгги бор 2017 йилнинг иккинчи чорагида АҚШ смартфонлар бозорида етакчига айланганди.
Мавзуга доир: Энг фойдали смартфонлар номи эълон қилинди
Изоҳ (0)