Қарийб ўн кун давомида «Бунёдкор» футбол академияси майдонлари миллионлар ўйини бўлмиш футбол ихлосмандлари билан гавжум бўлди. 22—30 октябрь кунлари бу ерда футбол бўйича вазирликлар, идоралар, хўжалик бирлашмалари, йирик корхона-ташкилотлар ходимлари ўртасида «Жисмоний тарбия ва спорт вазири кубоги» мусобақалари ўтказилди.
Ҳаяжонли лаҳзалар, қизғин ва муросасиз курашлар остида ўтган мусобақа бугун ўз поёнига етди. Ҳал қилувчи баҳсда «Халқ банки» ҳамда Агросаноат мажмуйида хизматлар кўрсатиш маркази ДУК жамоалари тўқнаш келишди.
Агар «Халқ банки» жамоаси бу каби мусобақаларда қатнашишнинг яхшигина ҳадисини олган бўлса, Агросаноат мажмуйида хизматлар кўрсатиш маркази ДУК ходимлари илк бора мана шундай мусобақаларда иштирок этишаётганди. Шунга қарамай дебютант финалгача бўлган йўлни шараф билан босиб ўтди. Бу йўлда улар Иқтисодий тараққиёт ва камбағалликни қисқартириш вазирлиги, Экология ва атроф муҳитни муҳофаза қилиш қўмитаси, Ўзстандарт агентлиги, «Микрокредит банк» АТБ ва ниҳоят ярим финалда Давлат божхона қўмитасини аяб ўтирмади. Бироқ, финалдаги рақиб ҳар қачонгидан жиддий эди.
Гарчи ўйин деярли тенгкурашлар остида ўтган бўлсада, якунда «Халқ банки» жамоаси йирик – 4:0 ҳисобида ғалабага эришди. Бунга сабаб, банкирлар яратилган имкониятлардан самарали фойдаланишган бўлса, мусобақа дебютантлари – Агросаноат мажмуйида хизматлар кўрсатиш маркази ДУК жамоаси кўплаб қулай вазиятларни кўкка совурди.
Учрашув якунида ғолиб ва совриндорлар ташкилотчилар томонидан медал, диплом ва қимматбаҳо эсдалик совғалари билан тақдирланишди. Мусобақа ғолибига бош соврин – кўчма кубокни Жисмоний тарбия ва спорт вазирининг биринчи ўринбосари Равшан Сайфиддинович Эрматов тантанали суръатда топширди.
Номинациялар бўйича ғолиблар:
«Энг яхши дарвозабон» – Баҳодир Мансуров (Давлат божхона қўмитаси)
«Энг яхши ҳимоячи» – Маъмур Султонов (Ўзбекистон футбол ассоциацияси)
«Энг яхши тўпурар» – Суннатилло Тошпўлатов (14та гол, Давлат божхона қўмитаси)
«Энг яхши иштирокчи» – Нажмиддин Ҳикматуллаев («Шарқ» нашриёти ДУК)
«Энг яхши волонтёр» – Юлдуз Носирова
3-ўрин – Давлат божхона қўмитаси
2-ўрин – Агросаноат мажмуйида хизматлар кўрсатиш маркази ДУК
1-ўрин – «Халқ банки»
Жисмоний тарбия ва спорт вазирлиги
Матбуот хизмати
Реклама ҳуқуқи асосида
Изоҳ (0)